टिष्टुङ्गय् न्हूदँ समारोह समिति
येँ (सन्ध्या टाइम्स)/टिष्टुङ्ग नेवाः खलःया वंगु असोज २४ गते च्वंगु मुँज्यां टिष्टुङ्गय् न्हूदँ सांस्कृतिक र्याली तःजिक हनेत विष्णु गोपालीया अध्यक्षताय् १२ म्ह दुजः दुगु छगू कमिटी नीस्वन ।
कमिटीं थुगुसी छगू सांस्कृतिक ज्याझ्वः यायेगु नं ग्वसाः दयेकूगु दु। नेपाल संवत्या महत्व गैर नेवाःतय् दथुइ नं प्रचार प्रसार यासें उमित नं दुथ्याकेगु निंतिं 'न्हूदँ सांस्कृतिक ज्याझ्वः ११३०' ज्याझ्वः यायेगु निर्णय मुँज्यां याःगु खः।
उगु सांस्कृतिक ज्याझ्वलय् नेवाः, सँय्, खय् व ब्रम्हूतय्गु सांस्कृतिक गतिविधियात नं दुथ्याकेगु निर्णय याःगु दु।
न्हूदँ ज्याझ्वः ताःलाकेत नीस्वंगु उगु समितिइ दुजः कजं प्रमोद जोशी, गणेशबहादुर महर्जन, रामेश्वर महर्जन, दया कपाली, तीर्थ खड्गी, चित्रबहादुर बलामी, रत्नमान गोपाली, गोविन्द गोपाली, हिरामान गोपाली व मीना महर्जनपिं च्वनादीगु दु ।
न्हूदँया ज्याझ्वःयात मकवानपुर जनजातीय अध्ययन समूह, टिष्टुङ्ग मिसा खलः, निष्पक्ष युवा समूह व वज्रवाराही युवा क्लबं ग्वाहालि याइगु खँ खलकं धाःगु दु ।
