म्हिगः नं नेप्से कुहां वन
येँ (सन्ध्या टाइम्स)/मोहनि नखः धुनेवं निन्हु लगातार थहां वनाः वयां लिपा मदिक कुहां वंगु नेप्से परिसूचक थुगु वाःया शुरुइ नं कुहां वंगु दु। नेपाल स्टक एकसचेन्जं बिउगु जानकारी कथं प्राविधिक कारणं यानाः म्हिगःया कारोबार साबिक स्वयां बाघौ लिपा जक शुरु जूगु खःसा कारोबार बन्द नं बाघौ लिपा हे जुल ।
कारोबार शुरु जुइवं हे पौने १ घण्टा तक नेप्से थहां कुहां जुयाच्वंगु खःसा वयां लिपा कुहां वंगु नेप्से अन्ततः ५ दशमलव शुन्य ४ अंकं कुहां वनाः ६ सय अंकं नं कुहां वंगु दु। नेप्से म्हिगःया कारोबारं ५९९ दशमलव ३३ अंकय् थ्यंगु दु। अथे हे सेन्सेटिभ नं १ दशमलव शुन्य १ अंकं कुहां वःगु दुसा फ्लोट शुन्य दशमलव ४३ अंकं कुहां वःगु दु ।
स्टायण्डर्ड चार्टर्ड, सिटिजन्स बैंक, बीओके, एभरेष्ट व सिद्धार्थया लिसें कारोबार जूगु दक्वं वाणिज्य बैंकया शेयरय् भाः कुहां वनेवं थुगु समुह ६ दशमलव २ अंकं कुहां वयाः ५८२ दशमलव ७६ अंकय् थ्यंगु दु। अथे हे जलविद्युत समुह नं १ दशमलव ३५ अंकं कुहां वयाः ८२६ दशमलव ३४ अंकय् थ्यन। विमा समुह नं शुन्य दशमलव १३ अंकं कुहां वनाः ६०८ दशमलव ९४ अंकय् थ्यंगु दु। उखे म्हिगःया कारोबारय् विकास बैंक समुह छगू जक शुन्य दशमलव ८५ अंकं थहां वनाः ६५४ दशमलव ५ अंकय् थ्यंगु दु ।
ख्वीन्हय्गू कम्पनीया कारोबार जूगुली स्वीगुंगू कम्पनीया भाः कुहां वंगु दुसा झिंन्यागू कम्पनीया भाः थहां वंगु दु। झिंनिगू कम्पनीया भाः यथावत हे जुल। कारोबार कम्पनीत मध्ये हाकनं टक्वः नेशनल हाइड्रो पावरया दकलय् अप्वः १२,५०० कित्ता शेयर न्याये मी जुल ।
म्हिगः प्यंगू करोड ख्वीगुंगू लाख चय्स्वद्वः तका दां
बराबरया ख्वीन्य्द्वः खुसः व न्यय्खुगू कित्ता शेयर न्याये मी जुल। कारोबार कम्पनीत मध्ये स्टायण्डर्ड चार्टर्ड बैकं दां ल्याखं दकलय् अप्वः छगू करोड स्वीच्यागू लाख पीछद्वः तका दांया कारोबार याःगु दु। एलायन्स इन्स्योरेन्स कम्पनीं दकलय् अप्वः कमे याःगु दुसा सिटिजन्स बैंक इन्टरनेशनलं अप्वः गुमे याःगु दु ।
