सुजाता नं उपप्रधानमन्त्री जुल
नेपाली कांग्रेसया नेतृ सुजाता कोइराला सोमवाः निसें उपप्रधानमन्त्री जुयादीगु दु । प्रधानमन्त्री माधवकुमार नेपालं सोमवाः परराष्ट्रमन्त्री कोइरालायात उपप्रधानमन्त्री नियुक्त यानादीगु खः ।
प्रधानमन्त्री पाखें उपप्रधानमन्त्री नियुक्त जुयादिम्ह कोइरालायात सोमवाः हे प्रधानमन्त्री नेपालं राष्ट्रपति डा. रामवरण यादवया उपस्थितिइ शितल निवासय् पद तथा गोपनियताया सपथ ग्रहण याकादीगु दु ।
वयेकयात उपप्रधानमन्त्रीलय् नियुक्त यायेत कांग्रेस सभापति गिरिजाप्रसाद कोइराला नापं कांग्रेसया नेतातय्सं प्रधानमन्त्रीयात तःक्व हे इनाप याःगु व प्रधानमन्त्रीं उकीयात वेवास्ता याःगुलिं परराष्ट्रमन्त्री कोइरालां निला: न्ह्य: प्रधानमन्त्री नापया भारत भ्रमण रद्द याःगु बुखँत संचार माध्यमय् पिहांवःगु खः ।
वयेकयात उपप्रधानमन्त्रीलय् याःगु नियुक्ति नापं आः देशय् निम्ह उपप्रधानमन्त्री दत । मधेशी जनअधिकार फोरम (लोकतान्त्रिक)या अध्यक्ष विजय कुमार गच्छदारयात थ्वस्वयां न्ह्यः हे उपप्रधानमन्त्री नियुक्त याःगु खः ।
