माओवादी अतिवादया प्रतिकार यायेमा: : पोखरेल
नेकपा (एमाले)या महासचिव ईश्वर पोखरेलं माओवादीं सहमति याये चाहे मजूगुलिं वर्तमान राजनीतिक गतिरोध मज्यंगु द्वपं बियादीगु दु ।
सोमवाः भ्वँतय् जूगु छगू ज्याझ्वलय् न्ववानादिसें वयेकलं सहमतिया राजनीतिया प्रमुख वाधक माओवादी जूगु धयादिल । वयेकलं दलत नाप कोठाय् माओवादीं सहमतिया खँल्हाइगु व पिने मेगू हे न्ववायेगु ज्या यानाच्वंगुलिं गतिरोध ज्यंकेमफुगु दाबी यानादिल । वयेकलं माओवादीं थंज्याःगु पहलय् सुधार मयातल्ले सहमति यायेत थाकुइगु धयादिल ।
माओवादीया अराजक गतिविधि व अतिवादया अन्त्य मजुइकं सहमतिया राजनीति संकटय् लाइगु धयादिसें नेता पोखरेलं प्रजातान्त्रिक मोर्चाया नांमय् राजनीतिक ध्रुवीकरण जूसाः देय् संकटय् लाइगु ख्याच्वः बियादिल ।
वयेकलं सहमतिया राजनीति आः बिच्चे थानाच्वंगु धयादिसें तत्काल राजनीतिक सहमति जुइमफुसाः ईलय् हे संविधान निर्माण जुइमफइगु धयादिल । ईलय् हे संविधान निर्माणया निंतिं माओवादी अतिवाद व अराजकताया प्रतिकार यायेत नं वयेकलं कार्यकर्तातय्त इनाप यानादिल । वयेकलं प्रतिकार मयासाः ईलय् हे संविधान निर्माण मजुइगु नं धयादिल ।
