लडाकूतय् भविष्य सुनिश्चित यायेगु आर्थिक प्याकेज महत्वपूर्ण : बलदेव

एकीकृत नेकपा (माओवादी) सेनाया डेपुटी कमाण्डर चन्द्रप्रकाश खनाल 'बलदेवं' अनमिन पाखें अयोग्य प्रमाणित याःपिं लडाकू पुनःस्थापनाया निंतिं सरकारं ह:गु प्याकेज प्रति असहमति प्वंकूगु दु ।

सोमवाः येँ रिपोटर्स क्लबय् जूगु ज्याझ्वलय् न्ववानादिसें वयेकलं अनमिनं अयोग्य प्रमाणित लडाकूतय्त समायोजन यायेगु खँय् सहमति दुसां सरकारं हःगु पुनःस्थापना प्याकेज व शब्दावलीलय् आपत्ति जूगु धयादिल । वयेकलं धयादिल, - 'पासाःपिंत समाजय् पुनःस्थापना यायेगु धैगु खँग्वः उपयुक्त मखु, भविष्यय् सुनिश्चित यायेगु आर्थिक प्याकेज महत्वपूर्ण खः ।'

वयेकलं अयोग्य लडाकूतय्त शिविरय् पीन्यान्हु निसें झिंछलाः तक व्यवसायिक तालिम बीगू व उकीं लिपाः ब्वने दइगु वा विदेश वनेदइगु कथंया सरकारी विकल्प प्याकेजय् दुगु धयादिसें व्यवसायिक तालिम बिया जक लडाकूतय् भविष्य सुनिश्चित मजुइगु धयादिल । वयेकलं मालिक व मजदूर स्वयम लडाकूत जुइ कथं सहकारी च्यायेकीगु व थुकीया दुने फ्याक्ट्रि संचालन यायेगु निंतिं थाय् उपलब्ध यायेत आर्थिक ग्वाहालि यायेत सरकार नाप मौखिक प्रस्ताव यानागु धयादिल ।

अथेहे ज्याझ्वलय् वयेकलं रक्षामन्त्री विद्या भण्डारीं सेनाय् लडाकू समायोजन यायेमज्यू धकाः न्ववानादीगु धापूतिइ आपत्ति प्वंकादिल । रक्षामन्त्रीया धापू शान्ति सम्झौता विपरित जूगु धयादिसें नेता बलदेवं थंज्याःगु धापू भीडन्त पाखे उन्मुख जूगु दाबी यानादिल । 'समायोजन यायेमफइगु ताकत रक्षामन्त्रीनाप मदु' वयेकलं धयादिल, - 'भीडन्त यायेगु कथंया थंज्याःगु अभिव्यक्ति आपत्तिजनक जू ।'