राष्ट्रपति व सेनाया विषयलय् सम्झौता यायेमते : थापा
राष्ट्रिय जनशक्ति पार्टीया अध्यक्ष सूर्यबहादुर थापां राष्ट्रपति व सेनाया विषयलय् छुं नं सम्झौता मयायेत प्रधानमन्त्रीयात सुझाव बियादीगु दु ।
भारत भ्रमणं नकतिनि लिहांझायादिम्ह थापां प्रधानमन्त्री माधवकुमार नेपालयात सोमवाः नापलानाः भारतं नं राष्ट्रपति व सेनाया मर्यादाय् आँच मवइगु कथंया सहमति यानाः वर्तमान गतिरोध ज्यंकेमा:गु बिचाः प्वंकूगु कनादिसें अथेहे यानाः निकास मालेत इनाप यानादिल ।
राष्ट्रपतिया पलाःया बारे संसदय् सहलह मजूतल्ले राजनीतिक गतिरोध ज्यंकेमबीगु अडान माओवादीं कयाच्वंगु ईलय् पुलांमह प्रधानमन्त्री नं जुयादिम्ह थापां थंज्याःगु खँ धयादीगु दु । वयेकलं भारत भ्रमणया झ्वलय् भारतीय प्रधानमन्त्री मनमोहन सिंह, विदेशमन्त्री एस. एन. कृष्णा लगायत नेतात नाप नापलानादीगु खः ।
खँल्हाबंलाय् संविधान निर्माण, वर्तमन राजनीतिक गतिरोध, संसदय् जुयाच्वंगु अवरोध व सरकारया गतिविध बारे नं सहलह जूगु खः ।
खँल्हाबंला लिपाः पत्रकारत नाप खँल्हानादिसें नेता थापां प्रधानमन्त्री नाप समसामयिक विषयलय् खँल्हाबंला जूगु धयादिल । अथेहे वयेकलं भारतीय नेतात वर्तमान सरकारया पक्षय् दुगु जानकारी नं प्रधानमन्त्रीयात यानाःगु धयादिल ।
अथेहे वयेकलं सोमवाः हे नेपाली कांग्रेसया सभापति गिरिजाप्रसाद कोइरालायात नं नापलानादीगु दु । कोइराला निवास महाराजगंज थ्यंकाः यानादीगु खँल्हाबंलाय् वर्तमान राजनीतिक संकट, थःगु भारत भ्रमण व उच्चस्तरिय राजनीतिक संयन्त्रया बारे खँल्हाबंला जूगु जानकारी नेता थापां बियादिल ।
