माओवादीं संशोधन प्रस्ताव प्रस्तुत
संसद गतिरोध ज्यंकेगु निंतिं सत्तारुढ नेपाली कांग्रेस व नेकपा (एमालें) तयार याःगु मंकाः संकल्प प्रस्तावया मस्यौदाय् प्रमुख प्रतिपक्षी दल एकीकृत नेकपा (माओवादीं) परिमार्जन सहितया संशोधन प्रस्ताव न्ह्यब्व:गु दु । माओवादीं गतिरोध ज्यंकेगु निंतिं प्याकेजय् हे सहमति यायेमाःगु खँ नं धाःगु दु ।
माओवादीया संसदीय दलया ज्याकू सिंहदरवारय् सोमवाः एमाले नाप जूगु बैठकय् माओवादीं संशोधन प्रस्ताव एमालेयात लःल्हाःगु ख: । माओवादीं लःल्हाःगु संशोधन प्रस्तावय् सेनापति प्रकरणय् राष्ट्रपतिं ल्ह्वंगु पला: असंवैधानिक जूगु व नागरिक सर्वोच्चताया खँ स्पष्ट ढंगं मस्यौदाय् न्ह्थनेमाःगु खँ दुथ्यकातःगु दु । थ्वस्वां न्ह्यः स्वंगू दलया बैठकय् नं माओवादीं उगु हे अडान काःगु खः ।
बैठक लिपाः माओवादी उपाध्यक्ष नारायाणकाजी श्रेष्ठ 'प्रकाशं' माओवादीं ल्ह्वनाः च्वंगु मागया विषयय् मस्यौदाय् स्पष्ट ढंगं न्ह्यथनेमाःगु प्रस्ताव तयाःगु धयादिल । वयेकलं स्वंगू दलया शीर्ष नेताय्सं थुकी बारे खँल्हाबंला याइगु धाःसां बैठक च्वनेमफुगुलिं कार्यदल स्तरं हानं सहमितया कुतः याइगु कनादिल ।
एमाले नेता भरतमोहन अधिकारीं माओवादीं संशोधन प्रस्ताव हःसां उकीया बारे अध्ययन याये ल्यंदनीगु धयादिल । वयेकलं थप अध्ययन व दुई पक्षीय, त्रिपक्षीय सहलह लिपाः गतिरोध ज्यनीगु विश्वास प्वंकादिल । वयेकलं माओवादीं दिर्घकालीन रुपं समस्या समाधान यायेत प्याकेजय् सहमति यायेमाःगु बिचाः प्वंकूगु नं कनादिल ।
थ्वस्वयां न्ह्यः कांग्रेस व एमालें न्ह्यब्वःगु मस्यौदाय् थःपिनिगु मागया बारे स्पष्ट रुपं दुमथ्याकूगु धासें माओवादीं उगु मस्यौदाय् असहमति प्वंकूगु खः । कांग्रेस व एमालें राष्ट्रपतिं ल्ह्वंगु पलायात बारे संसदय् सहलह जुइमफइगु अडान कयाच्वंगु दु ।
