स्वन्ति धुनेवं माओवादी नेतृत्वया सरकार : भट्टराई
एकीकृत नेकपा (माओवादी)या उपाध्यक्ष डा. बाबुराम भट्टराईं स्वन्ति धुनेवं माओवादी नेतृत्वया राष्ट्रिय सरकार गठन जुइगु दाबी यानादीगु दु ।
सोमवाः गोरखाय् जूगु छगू ज्याझ्वलय् न्ववानादिसें उपाध्यक्ष भट्टराईं वार्ता व सहमतिया आधारय् हे माओवादीया नेतृत्वय् राष्ट्रिय सहमतिया सरकार गठन जुइगु व वर्तमान कतांमरी सरकारं बिदा काइगु धयादिल । वयेकलं वर्तमान सरकार सत्ताय् च्वनांच्वंसाः संविधान नं निर्माण मजुइगु व शान्ति प्रकॄया नं धरापय् लाइगु धयादिल । वयेकलं माओवादी नेतृत्वया रष्ट्रिय सरकारया विकल्प मदुगु धयादिसें स्वन्ति लिपा नं माओवादी नेतृत्वया सरकार गठन मजूसाः जनतायात सतकय् क्वकायेगु ख्याच्वः बियादिल ।
गोरखा अस्पताल परिसरय् च्वंगु जनस्वास्थ्य सहकारी संस्था लिमिटेडं संचालनय् हःगु फार्मेसीया उल्लेज्या यानादिसें वयेकलं राजनीतिक गतिरोध ज्यंकेगू निंतिं कुतः जुयाच्वंगु व याकनं हे समस्या ज्यनीगु नं विश्वास प्वंकादिल ।
