माओवादी लडाकुया व्यवस्थापन शुरु
येँ (सन्ध्या टाइम्स)/ माओवादीया अयोग्य सेनाया पुनर्स्थापना थनिंनिसें न्ह्यात। माओवादी जनमुक्ति सेनाया शिविरय् च्वनाच्वंपिं मस्त व अयोग्य लडाकूतय्त शिविरं लिकयाः मेथाय् पुनर्स्थापना यायेगु निंतिं सिन्धुलीया दुधौलीं न्ह्याकूगु खँ शान्ति तथा पुनर्निर्माण मन्त्री रकम रेम्जोङं कनादीगु दु ।
उकिया निंतिं शान्ति मन्त्री चेम्जोङ, अनमिनया प्रतिनिधि व माओवादीया डेपुटी कमान्डर चन्द्रप्रसाद खनाल (बलदेव)या छगू पुचः उखेपाखे वंगु खः ।
अयोग्य व उमेर मगाःपिं लडाकूतय्त तत्काल भरण पोषण सहित थीथी शहरया अस्थायी क्याम्पय् तयेगु जानकारी नं मन्त्री चेम्जोङं बियादीगु दु। वय्कःया कथं ४५ न्हुया दुने फुक्कं अयोग्य लडाकुया पुनर्स्थापना यायेगु तयारी जुयाच्वंगु दु ।
मन्त्री चेम्जोङं कनादी कथं अयोग्य लडाकुतय्त समाजय् व योग्य लडाकुतय्त विशेष समितिया सिफारिसय् सेना, प्रहरी, सुरक्षा गार्ड व मेगु निकायय् समायोजन यायेगु जुइ।
संयुक्त राष्ट्र संघीय मिसन अनमिनं मुख्य ७ शिविर व २१ गू सहायक शिविरय् १९ हजार ६२२ लडाकु दुगु प्रमाणित याये धुंकूगु दुसा उकी मध्ये २ हजार ९७३ म्ह १८ दँ क्वय्यापिं खः। अयोग्य लडाकुतय्सं थःपिंत सुरक्षा निकाय दुने हे समायोजन यायेमाः धयाच्वंगु दु ।
