प्रमपाखें सैनिक मुख्यालय निरीक्षण
येँ (सन्ध्या टाइम्स)/प्रधानमन्त्री माधव नेपालं थौं सैनिक मुख्यालयया भ्रमण यानादिल। भ्रमणया इलय् प्रम नेपालयात सेनाया थीथी विभागया प्रमुखतय्सं विभागया संरचना व कार्य विवरणया बारे जानकारी याकादीगु खः।
शान्ति सम्झौताया छुं बुँदाया कारणं नेपाली सेनाया ल्वाभः, गोली गट्ठा, बन्दोवस्तीया सामान न्यायेगु, सेना भर्ना व तालिम लगायत थीथी ज्याय् लिच्वः लानाः उकिं सेनाया मनोबल कुहां वयाच्वन धइगु रक्षा मन्त्री विद्यादेवी भण्डारीया धापू सार्वजनिक जुयाः विवाद जुयाच्वंगु इलय् लाक्क प्रम नेपालं यानादीगु सैनिक मुख्यालयया निरीक्षण भ्रमणयात राजनीतिक ख्यलं नं अर्थ पूर्ण रुपं कयाच्वंगु दु ।
रक्षामन्त्री भण्डारीं आः नकतिनि नं माओवादी सेनायात नेपाली सेनाय् समावेश यायेगु सम्भावना हे मदुगुलिं उमित भत्ता बियाः लित छ्वयेमाः धयादीगु खः ।
