नेवाः महागुथिया तुच्चा ज्याझ्वः
येँ (सन्ध्या टाइम्स)/नेपाल संवत् ११३० न्हूदँया लसताय् नेवाः महागुथि नेपाःपाखें म्हिगः थन छगू तुच्चा ज्याझ्वः यात ।
ज्याझ्वःया उलेज्या गुथिया पुलांम्ह अध्यक्ष शंकरमान तुलाधरं यानादीगु खः । मूछ्याञ्जे दुर्गामान खड्गी लसकुस यानाः न्ह्याःगु ज्याझ्वलय् न्हूदँ समारोह समितिया नायः सभासद् तीर्थराम डंगोल, नेपालभाषा मंकाः खलःया छ्याञ्जे नरेशवीर शाक्य, मिस नेवाः आकाशा बज्राचार्य, महागुथिया नायः डा. देवरत्न कंसाकार, डिल्लीराम नकर्मि व छ्याञ्जे कुमार रञ्जितपिंसं थःथःगु नुगः खँ प्वंकूगु खः ।
ज्याझ्वलय् पुलांम्ह मन्त्री एवं सभासद् हिसिला यमि, नेपाः राष्ट्रिय पार्टीया महासचिव विजय सैंजु लिसें आपालं भाषिक कार्यकर्तातय्सं व विदेशी पाहांपिंसं नं ब्वति काःगु खः ।
