छवाःया नेप्से ३० अंकं कुहां वन
येँ (सन्ध्या टाइम्स)/मोहनि धुंकाःया थुगु वालय् नेप्सेय् जूगु शेयर कारोबारय् छवाःया दुने मुक्कं नेप्से परिसूचक ३० दशमलव शुन्य ७ अंकं कुहां वल। वालय् ६३४ दशमलव ४४ अंकं शुरु जूगु शेयर कारोबार वाःया लिपांगु न्हिं ६०४ दशमलव ३७ अंकय् थ्यंकाः बजाः बन्द जूगु खः ।
नेपाल स्टक एक्सचेन्जय् थ्व वालय् ग्वीगू कम्पनीया शेयर न्याये-मी जुल। थ्व ल्याखं ४१४१ कारोबारं नीच्यागू करोड न्हय्गू लाख स्वीनिद्वः तका दां बराबरया न्यागू लाख पीनिद्वः व न्हय्सः कित्ता शेयर न्याये-मी जुल। वयां न्ह्यःया वालय् चय्छगू कम्पनीया २९१९ कारोबारं नीन्यागू करोड प्यंगू लाख स्वीछद्वः तका दांया स्वंगू लाख न्यय्प्यद्वः व च्यासः कित्ता शेयर कारोबार जुल ।
थ्व ल्याखं वंगु वालय् स्वयां थुगु वालय् जूगु कारोबारय् दांया ल्याखं १२ दशमलव १० प्रतिशतं थहां वंगु दु। अथे हे 'क' वर्गया कारोबार मापन याइगु सेन्सेटिभ इन्डेक्स नं थ्व वालय् ११ दशमलव ११ अंकं कुहां वंगु दु। सेन्सेटिभया कारोबार वाःया न्हापांगु न्हि १६३ दशमलव ६४ अंकं शुरु जूगु खःसा लिपांगु न्हि १५२ दशमलव ५३ अंकय् थ्यंकाः बजाः बन्द जूगु खः ।
थ्व वालय् 'क' वर्गया कम्पनीं जक झिंन्यागू करोड गुंगू लाख तका दांया कारोबार याःगु दु। थ्व नेप्सेय् छवाःया दुने जूगु कूल कारोबारया ५३ दशमलव ७५ प्रतिशत खः ।
थ्व वालय् न्यागू करोड नीखुगू लाख दां कारोबार याःगु लिधंसाय् स्टायण्डर्ड चार्टर्ड बैंक, छगू लाख ख्वीन्याद्वः कित्ता शेयर न्याये-मी जूगु लिधंसाय् नेपाल बङ्गलादेश बैंक व न्यासः व पीखुगू कारोबार जूगु लिधंसाय् पशुपति डेभलपमेण्ट बैंक न्ह्यःने लाःगु दु ।
थ्व वालय् नेपाल एक्सप्रेस फाइनान्सया हकप्रद, कुमारी बैंकया बोनस व अपि फाइनान्सया साधारण शेयर सूचीकृत जुल ।
