पाँय्म्वः पिदन
नेपालभाषाया प्यंगःथां मध्ये छगः कवि योगविर सिं कसाःया किपा दुगु वहःया पाँय्म्वः म्हिगः भिंतुना गुथिं सार्वजनिक यात। जनकवि दुर्गालाल श्रेष्ठं छगू ज्याझ्वःया दथुइ उगु पाँय्म्वःया विमोचन यानादीगु खः। ज्याझ्वलय् न्ववासें कवि श्रेष्ठं योगविर सिं उगु ईयाम्ह छम्ह क्रान्तिकारी खः धयादिल ।
न्हूदँ समारोह समिति-११३० नायः सभासद् तीर्थराम डंगोलं थुगुसी स्वन्ति गडबड यानातःगुलिं कार्तिक १, २ व ३ गते छसिकथं लक्ष्मी पुजा, म्हपुजा व किजापुजा न्यायेकेत इनाप यासें ३ गते नं सार्वजनिक बिदा बीत सरकारयात आग्रह यानादिल ।
भिंतुना गुथिया नायः विद्यासागर तुलाधरया सभापतित्वय् जूगु उगु ज्याझ्वलय् साहित्यकार लाभरत्न तुलाधर, मंकाः खलःया छ्यांज्ये नरेशवीर शाक्य, भिंतुना गुथि मिसा पुचःया नकिं सीता श्रेष्ठपिंसं नं न्ववानादीगु खःसा अन योगविर सिंया छय् भाजु रवीविर सिं कसाःयात दबुली थनाः म्हसीकेगु ज्या नं जूगु खः। कवि योगविर सिं कसां च्वयातःगु भजनत अन्नपूर्ण ज्ञानमाला खलःपाखें हालाः न्यंकुसें ज्याझ्वः न्ह्याकूगु खः ।
