छक्वलं निगू म्येँचा:

लिजः, नेपालभाषा कविता दबूया ग्वसालय् वंगु शुक्रवाः येँया परोपकार उच्च माध्यमिक विद्यालयया छगू तःजिगु मुँज्या जुल। उगु मुँज्याय् गीतकार राममान श्रेष्ठ 'तृषित' व नेपालभाषाया वरिष्ठ कवयित्री नारायणदेवी श्रेष्ठं त्वाःदेवाः च्याकाः सञ्चारकर्मी गायिका रीता महर्जनं याकः सलय् हालातःगु नेपालभाषाया 'पियाच्वना' व खय् भाय्या 'एकै नजरमा' सीडी म्येँचाःया उलेज्या यानादिल ।

विमोचित उगु सीडी म्येँचाःया बारे वरिष्ठ गायक योगेश वैद्यं समीक्षात्मक टिप्पणी यानादीगु खः। टिप्पणीया झ्वलय् वय्कलं 'म्येँया आत्मा वा ज्यान धइगु सिद्धहस्त साहित्यकारपिनिगु म्येँ व संगीतकारतय्गु चयन खः, मय्जु महर्जनं थ्व खँय् ध्यान बियादीगु दु' धयादिल। नापं वय्कलं 'हृदयय् घाः जुयाः पिज्वइगु म्येँ हे ह्दयस्पर्शी जुइगु' खँ कनादिसें 'न्हूपिं कलाकारतय्त संरक्षण, संवर्द्धन यायेगु झी सकसिगुं जिम्मेवारी खः' धयादीगु दु ।

गीतकार राममान श्रेष्ठ 'तृषितं' छपु बांलाःगु म्येँ निर्माण जुइत गीत, संगीत व शब्द स्वतां बांलायेमाः धयादिसें 'न्हापा न्हापा म्येँ चिनामि, संगीतकार व म्येँ हालामि छथासं च्वनाः रियाज यायेगु खँ कनादिसें थौंकन्हय्या कलाकारपिंके थ्व खँय् कम्युनिकेशन ग्याप जुयाच्वंगु खनेदु' धयादिल।
विमोचित 'पियाच्वना' नेपालभाषाया सीडी म्येँचाखय् मय्जु महर्जनया झिंप्यपु म्येँ दुथ्यानाच्वंगु दुसा 'एकै नजरमा' म्येँचाखय् खय् भाय्या ११ पु म्येँ दुथ्यानाच्वंगु दु। 'पियाच्वना' म्येचालय् नेपालभाषाया च्वमिपिं जनकवि दुर्गालाल श्रेष्ठ, नारायणदेवी श्रेष्ठया लिसें सुरेश किरण, प्रतिसरा साय्मि, नवीन चित्रकार, जीवनलाल मास्के, रजनी मिला, ईश्वरीमैया श्रेष्ठ, शैलेश शाक्य, रीता महर्जनया रचनात दुथ्याः। उकी नरेन्द्र 'प्यासी', गोविन्द ह्यूमत, स्व. निलबहादुर चित्रकार, जीवनलाल मास्के, तीर्थ माली, गंगाधर वज्राचार्य, सानुबाबु महर्जन लिसें गायिका थम्हं हे नं संगीत तयातःगु दु।
विमोचन ज्याझ्वलय् गायिका महर्जनं थःगु म्येँचाकय् दुथ्याःगु स्वपु म्येँ हालादीगु खः। लिजः, नेपालभाषा कविता दबूया नायः नवीन चित्रकारया सभापतित्वय् ज्याझ्वः जूगु खः ।