'सरकारं शान्ति सम्झौताया स्पिरित विपरित ज्या यानाच्वंन'
प्रमुख प्रतिपक्षी दल एकीकृत नेकपा (माओवादीं) वर्तमान सरकार व उकीया मन्त्रीतय्सं बृहत शान्ति सम्झौता व अन्तरिम संविधानया प्रावधान व स्पिरिट विपरित निर्णय यायेगु व अभिव्यक्ति बीगू ज्या यानाच्वंगु धासें आपत्ति प्वंकूगु दु ।
आइतवाः माओवादीया उपाध्यक्ष डा. बाबुराम भट्टराईं माओवादी पार्टी व संयुक्त राष्ट्रिय जनआन्दोलन समितिया मंकाः विज्ञप्ति पिथंनादिसें रक्षामन्त्री विद्या भण्डारीं व्यवस्थापिका संसदाया राज्य व्यवस्था समितिलय् बृहत शान्ति सम्झौता व सेना व ल्वाभः अनुगमन सम्झौताय् सेना सम्बन्धी गुलिखें प्रावधान संशोधन यायेमाः धकाः न्ववाःगु गैरजिम्मेवारपूर्ण, दुराशययुक्त व अपत्तिजनक जूगु खँ न्ह्यथंनातःगु दु ।
विज्ञप्तिइ थंज्याःगु अभिव्यक्ति शान्ति प्रकृया स्यंकेगु व द्वन्द्व ब्वलंकेगु मनसाय कथं जूगु धयादिसें अज्याःगु अभिव्यक्ति कथं ज्या मयायेत सरकारयात गम्भीर ख्याच्वः ब्यूगु दु ।
अथेहे विज्ञप्तिइ राजनीतिक सहमति कथं गठन जूगु वैज्ञानिक भूमिसुधार आयोगयात एकपक्षीय ढंगं विघटन यानाः थः यथ्थे सरकारं मेगू आयोग घोषणा याःगु ज्या पाखें शान्ति सम्झौत उल्लंघन जूगु धासें उकीया भर्त्सना याःगु दु । नापं सरकारं स्थानीय शान्ति समितिलय् कार्यरत सचिव व मेपिं कर्मचारीतय्त चीकाः एकपक्षीय ढंगं न्हूपिं नियुक्ति याःगु प्रति नं आपत्ति प्वंकूगु दु ।
माओवादी नं शान्ति प्रकृयाया छगू त:धंगु हिस्सा जूगुलिं माओवादीया सहमति व संलग्नता बिना थीथी स्तरया शान्ति समितिया छुं अर्थ व औचित्य मदुगु खँ धाःगु दु ।
वर्तमान सरकारयात कठपुतली सरकारया संज्ञा बियाः पिथंगु विज्ञप्तिइ सरकारं बृहत शान्ति सम्झौता बिपरित यानाच्वंगु थंज्याःगु ज्याया सम्पूर्ण जिम्मेवारी थ्व कठपुतली सरकारं बहन यायेमाःगु धासें गम्भीर ख्याच्वः ब्यूगु दु ।
