सर्वसत्तावादी बिचाः बाधक : ल्याण्डग्रेन

नेपाः स्थित राष्ट्रसंघीय उच्चायुक्त करिन ल्याण्डग्रेनं छुं नं दलं राष्ट्रया समस्या समाधान यायेगु निंतिं सैनिक व सर्वसत्तावादी बिचाः तयेमज्यूगु खँ धयादीगु दु ।

आइतवाः सिन्धुलीया दुधौली स्थित माओवादीया शिविरय् अयोग्य लडाकूतय् विदाई ज्याझ्वलय् न्ववानादिसें वयेकलं नेपाःया भावी शान्ति व स्थायित्व थीथी पक्ष दथुइया बल्लाःगु समन्वयलय् निर्भर जुइगु दाबी यानादिल । वयेकलं धयादिल, - 'सम्झौता व समन्वयया आधारय् याइगु वार्ता हे दिगो शान्तिया निंतिं लँपू जुइ ।'

अनिमिन प्रमुख ल्याण्डग्रेनं संविधान निर्माण यायेगु प्रतिनिधिमूलक संस्था संविधानसभा जूगुलिं उगु संस्था पाखें ईलय् हे संविधान निर्माण यायेत दक्वं लगेजुइमाः धयादिल ।

अयोग्य लडाकूया विदाइ प्रकृया विश्वास, इमान्दारिता व प्रतिबद्धताया महत्वपूर्ण संकेत जूगु खँ ल्याण्ग्रेनं धयादिल । वयेकलं विदाई व पुनःस्थापना प्रकृयाया प्रगतियात संयुक्त राष्ट्र संघीय सुरक्षा परिषद लगायत अन्तर्राष्ट्रिय स्तरं ‍सतर्कता पूर्वक स्वयाच्वंगु धयादिल ।