सेनायात थप समावेशी व लोकतान्त्रिक दयेकेत प्रधानमन्त्रीया निर्देशन
प्रधानमन्त्री माधवकुमार नेपालं नेपाली सेनाय् मिसा, दलित, मधेशी, जनजाति लगायत ल्यूने लाःगु समुदायया ल्या अप्वयेकाः समावेशी दयेकेत निर्देशन बियादीगु दु ।
सैनिक मुख्यालय निरीक्षणया झ्वलय् आइतवाः भद्रकाली थ्यंकादिम्ह प्रधानमन्त्री नेपालं सैनिक अधिकारीतय्त अज्याःगु निर्देशन बियादीगु खः । वयेकलं नेपाली सेना हे राष्ट्रया सेना जूगु व राष्ट्र व जनतायात सेनाया आवश्यक्ता महशुस जूगु धयादिसें सेनायात थप लोकतान्त्रिक दयेकेमाः धयादिल ।
उपप्रधानमन्त्री विजयकुमार गच्छदार, परराष्ट्रमन्त्री सुजाता कोइराला, रक्षामन्त्री विद्या भण्डारी, रक्षा सचिव नविन घिमिरे सहित सैनिक मुख्यालयया निरीक्षण यानादिम्ह प्रधानमन्त्रीं नेपाली सेनाया संरक्षाण् व व्यवसायिकताया निंतिं सरकारं ठोस पलाः ल्ह्वनेगु प्रतिबद्धता प्वंकादिल ।
उगु ईलय् सैन्य अधिकारीतय्सं शान्ति सम्झौताया प्रावधानया कारणं नेपाली सेनाय् भर्ना प्रकृया अवरुद्ध जुया दरबन्दी खाली जूगु नापं ज्या यायेत समस्या उत्पन्न जूगु गुनासो प्रधानमन्त्रीयात प्वंकूगु खसाः लिसलय् प्रधानमन्त्रीं उगु विषयलय् परामर्श यायेगु धयादिल ।
मुख्यालय निरिक्षणया झ्वलय् सैन्य अधिकारीतय्सं प्रधानमन्त्रीयात नेपाली सेनाया संरचना, कार्यविवरण व समस्या बारे जानकारी याकूगु खः ।
लुमंकेबहजू, छुं दिं न्ह्यः जक रक्षामन्त्री विद्या भण्डारीं शान्ति सम्झौताया छुं बुँदां सैन्य भर्ना प्रकृया अवरुद्ध जूगु धासें शान्ति सम्झौतायात संशोधन यायेगु विषयलय् पुर्नविचार यायेत संसद समक्ष इनाप यानादीगु खः ।
