अयोग्य लडाकूतय् पुनःस्थापना प्रकृया न्ह्यात
सरकारं माओवादी लडाकूया शिविरं अयोग्य लडाकूतय्त पुनःस्थापना यायेगु ज्या आइतवाः निसें शुरु याःगु दु ।
शान्ति मन्त्री रकम चेम्जोङ, अनमिन प्रमुख करिन ल्याण्डग्रेन व माओवादी डेपुटी कमाण्ड चन्द्र प्रकाश खनाल 'बलदेव' सहित झिंच्याम्हया पुचः सिन्धुलीया दुधौली च्वंगु माओवादी शिविरय् वनाः थुगु प्रकृया शुरु याःगु खः । दुधोली च्वंगु उगु मुख्य शिविर अन्तर्गत स्वंगू सहायक शिविरय् १९३२ म्ह माओवादी लडाकूत च्वनावयाच्वंगु दु ।
पुनःस्थापना ज्या अन्तर्गत अयोग्य लडाकूयात शिविरं लिकायेत सूचः जारी यायेगु, अस्थाइ शिविरय् त्येगु व लिपाः समाजय् पुनःस्थापना यायेगु लगायत चरणबद्ध ज्याझ्व: सरकारं न्हापा हे तयार यायेधुंकूगु दु ।
अनमिनं १९६०२ लडाकूत प्रमाणिकरण याःगु दुसाः उकी अयोग्य ठहर जूपिं ४००८ लडाकूत अझ नं माओवादीया थीथी शिविरय् च्वनाच्वंगु दु ।
