संवैधानिक समितिया बैठक च्वनः
संविधान निर्माण यायेगु निंतिं संविधानसभाया दकलय् महत्वपूर्ण संवैधानिक समितिया बैठक आइतवाः च्वंगु दु ।
आइतवाः सुथय् सिंहदरवारय् समितिया ज्याकूथी च्वंगु बैठकय् संवैधानिक समिति अन्तर्गत उपसमितिं लःल्हाःगु प्रतिवेदनया बारे सहलह जूगु खः । बैठकय् समितिया दुजःतय्सं असहमतिया दथुइ सहमतिया केन्द्रविन्दु मालेमाःगु खँय् बः ब्यूगु खः ।
आइतवा:या बैठकय् समितिलय् दुजः कथं दुपिं शीर्ष नेतातय्सं नं ब्वति काःगु खः । बैठकय् प्रधानमन्त्री नापं नेकपा (एमाले)या वरिष्ठ नेता माधवकुमार नेपाल, एकीकृत नेकपा (माओवादी)या उपाध्यक्ष डा. बाबुराम भट्टराई, नेपाली कांग्रेस संसदीय दलया नेता रामचन्द्र पौडेल, मधेशी जनअधिकार फोरमया अध्यक्ष उपेन्द्र यादव लगायतं ब्वति काःगु खः ।
बैठकय् प्रधानमन्त्री नेपालं आम सहमति यायेगुलि थुगु समितिया विषेश भूमिका दुगु धयादिसें सहलहयात तीव्र रुपं न्ह्याकेमाःगु बिचाः प्वंकादिल । अथेहे माओवादीया उपाध्यक्ष भट्टराईं जनयुद्ध जनआन्दोलन व मधेश आन्दोलनया मर्मयात संवोधन यानाः न्हूगु मस्यौदा निर्माण यायेमाः धयादिल ।
कांग्रेस संसदीय दलया नेता पौडेलं दक्वः समस्यायात सहमति यानाः न्ह्याः वनेमाः धयादिलसा: फोरम अध्यक्ष यादवं जनयुद्ध जनआन्दोलन व मधेश आन्दोलन मर्मयात आत्मसात यानाः जक सहमति जुइफइ धयादिल ।
