चीनं लिहांवयेवं सहमति : प्रचण्ड
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' थःगु चीन भ्रमण लिपाः वर्तमान राजनीतिक गतिरोध बारे दलत दथुइ सहमति जुइगु खँ धयादीगु दु ।
छवाःया निंतिं चीन भ्रमणय् वनेन्ह्यः त्रिभुवन अन्तराष्ट्रिय विमानस्थलय् संचारकर्मीत नाप खँल्हाबंला यानादिसें अध्यक्ष प्रचण्डं सहमतिया निंतिं दलत दथुइ कुतः जुयाच्वंगु धयादिसें कांग्रेस व एमालें न्ह्यब्वःगु मंकाः संकल्प प्रस्तावया मस्यौदाय् माओवादीं संशोधन यानाः पेश याइगु धयादिल । वयेकलं थः चीन भ्रमणं लिहांवयेवं सहमति जुइगु विश्वास प्वंकादिल ।
अध्यक्ष प्रचण्ड थःगु चीन भ्रमण न्हापा हे तय जूगु व थुगु भ्रमण मैत्रिपूर्ण जुइगु धयादिसें छिमेकी देय्त दथुइया स्वापूति असर लाइगु कथं बुखँत मबीत संचारकर्मीत इनाप यानादिल । वयेकलं थुगु भ्रमण्य् निगू देय्या हितया बारे व निगू कम्युनिष्ट पार्टी दथुइया स्वापू सुधारया बारे नं खँल्हाबंला जुइगु कनादिल ।
चिनियाँ कम्युनिष्ट पार्टीया ब्वनाय् अध्यक्ष प्रचण्ड सहित उपाध्यक्ष मोहन वैद्य 'किरण' विदेश विभाग प्रमुख कृष्ण बहादुर महरा व प्रचण्डया काय् प्रकाश छवाः निंतिं आइतवाः बेइजिङ प्रस्थान याःगु दु ।
