प्रधानमन्त्री व प्रचण्डं कोइराला नापलात
प्रधानमन्त्री माधवकुमार नेपालं नेपाली कांग्रेसया सभापति गिरिजाप्रसाद कोइरालायात नापलाना निगू दलं तयार याःगु मंकाः संकल्प प्रस्तावया बारे सहलह यानादीगु दु ।
शनिवाः एमाले महासचिव ईश्वर पोखरेल नापं कोइराला निवास महाराजगञ्जय् थ्यंकादिम्ह प्रधानमन्त्री नेपाल व कोइराला दथुइ मंकाः प्रस्तावय् माओवादीं याइगु संशोधन स्वयाः न्ह्यावनेगु सहमति जूगु खः । अथेहे कांग्रेस सभापति कोइरालां प्रधानमन्त्री नेपालयात माओवादी अध्यक्ष पुष्पकमल दाहाल 'प्रचण्ड' दथुइ जूगु खँल्हाबंलाया बारे नं जानकारी बियादीगु खः ।
शुक्रवाः प्रधानमन्त्री नेपाल नाप नापलये न्ह्यः कोइरालां एकीकृत नेकपा (माओवादी)या अध्यक्ष प्रचण्ड नाप खँल्हाबंला यानादीगु खः । कोइराला व प्रचण्ड दथुइया सहलहलय् कांग्रेस व एमालें तयार याःगु मंकाः संकल्प प्रस्तावय् माओवादीं याइगु संशोधन, प्रचण्डया चीन भ्रमण लिपाः उच्चस्तरिय मंकाः राजनीतिक संयन्त्र निर्माण यायेगु बारे खँल्हाबंला जूगु जानकारी कांग्रेस नेत कृष्ण सिटौलां बियादिल ।
माओवादी अध्यक्ष प्रचण्डं आइतवाः निसें चीन भ्रमण यानादित्यंगुलिं शनिवाः बहनी स्वंगू दलया शीर्ष नेतातय् बैठक च्वनीगु धकाः क्वछीनातःगु खःसां एमाले अध्यक्ष झलनाथ खनाल स्वनिगलं पिने जूगुलिं बैठक च्वनेमफुत ।
