येँय् चिनियाँ महोत्सव शुरु
चीनय् जनगणतन्त्रया पलिस्था जूगु व कम्युनिष्ट पार्टीया सरकार स्थापना जूगु खुइदँया लसताय् शनिवाः निसें येँय् चीन महोत्सव शुरु जूगु दु ।
छवा: तक न्ह्याइगु महोत्सवया उल्लेज्या यानादिसें प्रधानमन्त्री माधवकुमार नेपालं क्षेत्रीय शान्ति व आपसी हितया निंतिं नेपाः व चीन दथुइया स्वापू बल्लाकेगु व बहुआयामिक दयेकेमा: धयादिल । वयेकलं निगू देय् दथुइया स्वापू तःब्याकाः न्हूगु उचाइलय् थ्यंकेत आवश्यक जूगु खँय् ब: बियादिल ।
प्रधानमन्त्री नेपालं चीनय् कम्युनिष्ट पार्टीया नेतृत्वय् खुइदँ तक जूगु प्रगति अवलोकन यायेगु व उकीं फाइदा कायेत नेपाःमित उत्सुक जूगु धयादिसें निगू देय् दथुइ पर्यटन व्यवसाय अप्वयेके माःगु बिचाः प्वंकादिल ।
चीनया च्याङसू प्रान्तिय सरकार व नेपाःया निंतिं चिनियाँ राजदूतावसं मकाः रुपं ग्वसाःग्वःगु महोत्सवय् चिनियाँ सांस्कृतिक ज्याझवः, किप ब्वज्या, संकिपा, नसाज्वलं लगायत खुइगू स्टल दुगु खँ ग्वसाः खलकं धाःगु दु । नेपाः प्रज्ञा प्रतिष्ठानय् न्ह्याःगु महोत्सवय् चिनियाँ एक्रोब्याटिक्स, फेसन शो नापं नांजाम्ह चिनियाँ साहित्यकार लु शुनया जीवनी आधारित विशेष ब्वज्या दुथ्याकातःगु दु ।
