'सरकारया विरुद्ध अविश्वासया प्रस्ताव याकनं हे पेश जुइगु'
मधेशी जनअधिकार फोरमया अध्यक्ष उपेन्द्र यादवं वर्तमान सरकार विरुद्ध याकनं हे अविश्वासया प्रस्ताव दर्ता जुइत्यंगु खँ धयादीगु दु ।
भारत भ्रमण लिपाः शनिवाः न्हापांगु पटक सार्वजनिक ज्याझ्वलय् ब्वति कयादिम्ह यादवं थ्व सरकार सुनां गठन याःगु खः वंहे सरकार विरुद्ध अविश्वासया प्रस्ताव दर्ता याइगु दाबी यानादिल । वर्तमान सरकार याकनं हे क्वदलीगु दाबी यानादिसें वयेकलं माधवकुमार नेपालया सरकार गुली ताःहाक सत्ताय् च्वनाच्वनी उली हे देशं दुर्दशा भोगे यायेमालीगु धयादिल । वयेकलं माधव नेपाल बाहेक निर्वाचित न्ह्याम्ह प्रधानमन्त्री जुसां थःपिंत मान्य जुइगु नं धयादिल ।
वयेकलं राष्ट्रिय सरकारया विकल्प मदुगु धयादिसें अज्याःगु सरकार गठन यायेन्ह्यः हे राष्ट्रिय मुद्दाया विषयलय् दलत दथुइ सहमति जुइमाः धयादिल । राष्ट्रिय सरकार न्ह्यः हे राष्ट्रिय मुद्दाय् सहमति जूसाः लिपा दलत दथुइ मतभेद मजुइगु बिचाः नेता यादवं प्वंकादिल ।
रिपोटर्स क्लबं याःगु ज्याझ्वलय् न्ववानादिसें यादवं विशेष सुरक्षा योजनाया नांमय् सरकारं मधेशी जनता विरुद्ध दमन यायेगु नीति हःगु धासें आक्रोश प्वंकादिल । वयेकलं मधेशी जनताया अधिकार स्थापित यायेगु निंतिं अझ नं आन्दोलन यायेत आवश्यक जूगु धयादिसें फोरमं छठ लिपाः हे आन्दोलनया तयारी याइगु धयादिल ।
