जनताया सः अवरुद्ध जुल : सभाध्यक्ष
संविधानसभाया अध्यक्ष सुवास नेम्वाङं लगातातया संसद अवरोधया कारणं जनताया सः अवरुद्ध जूगु खँ धयादीगु दु ।
पब्लिक क्याम्पस संघया च्याक्वःगु साधारण सभाया शनिवाः बुटवलय् उल्लेज्या यानादिसें वयेकलं लगातारया संसद अवरोधं जनताया अतिकं संवेदनशील व महत्वपूर्ण मुद्धात तकं जनप्रतिनिधितय्सं सहलह यायेमखंगु धयादिल । मध्य व सुदूरपश्चिमय् बाढी पहिरोया समस्या जुसां संसदय् सहलह याये मखंगु प्रति दुखः प्वंकादिसें राजनीतिक गतिरोध ज्यंकेत दलतय्त इनाप यानादिल ।
वयेकलं असोज २१ गतेया दुने राजनीतिक गतिरोध ज्यंकेगु प्रतिबद्धता प्वंकूगु नेतातय्सं प्रतिबद्धता कथं ज्या यायेमफुगु धयादिसें नेतातय्त संवेदनशील जुइत इनाप यानादिल । ईलय् हे संविधान निर्माण मजूसाः जनआन्दोलनं प्राप्त आः तकया उपलब्धित अर्थहीन जुइगु धयादिसें सभाध्यक्ष नेम्वाङ संसद अवरोधं संविधान निर्माणया ज्याय् नं लिच्वः लाकीगु धयादिल ।
