चीन भ्रमण बारे शंका मयायेत महराया इनाप
एकीकृत नेकपा (माओवादी)या विदेश विभाग प्रमुख कृष्णबहादुर महरां माओवादी अध्यक्ष पुष्पकमल दाहाल 'प्रचण्ड' सहित पार्टी नेतातय् चीन भ्रमण बारे शंका मयायेत इनाप यानादीगु दु ।
जनसंचार अभियानं शनिवाः येँ याःगु साक्षात्कार ज्याझ्वलय् न्ववानादिसें वयेकलं माओवादी सरकारय् दुगु ईलय् हे चीन भ्रमण तय जूगुलिं थुकीया बारे नकारात्मक टिप्पणी मयायेत व शंका मयायेत इनाप यानादिल ।
नेता महरां भ्रमण निगू देय्या स्वापू सुधारया विषयलय् केन्द्रीत जूगु धयादिल । चिनिँया कम्युनिष्ट पार्टीया ब्वनाय् भ्रमण तय जूगुलिं निगू पार्टी दथुइया स्वापू सुधारया विषय नं भ्रमणया प्रमुख एजेण्डा जुइगु वयेकलं कनादिल ।
वयेकलं चीन भ्रमणं भारत नापया स्वापूलय् छुं नं लिच्वः मलाइगु धयादिसें निगुलिं देय्त नाप बराबर स्वापू कायम यायेगु न्ह्यथंनादिल । वयेकलं चीन भ्रमणया झ्वलय् सु सु नाप खँल्हाबंला जुइगु बारे चीन थ्यंकाः तिनी क्वछीइगु धयादिल ।
माओवादी अध्यक्ष प्रचण्ड नापं उपाध्यक्ष मोहन वैद्य 'किरण', विदेश प्रमुख महरा, प्रचण्डया काय् प्रकाश सहितया उच्चस्तरी माओवादी पुचः आइतवाः बेइजिङ वनेत्यंगु दु ।
