'माओवादी स्वयां झी नागरिक सर्वोच्चता प्रति प्रतिबद्ध'
गृहमन्त्री भीम रावलं नागरिक सर्वोच्चताया माग यानाः आन्दोलन यानाच्वंपिं एकीकृत नेकपा (माओवादी) स्वयां नेपाली कांग्रेस व नेकपा (एमाले) हे नागरिक सर्वोच्चता प्रति प्रतिबद्ध व जिम्मेवार जूगु खँ धयादीगु दु ।
शनिवाः मध्य व सुदूर पश्चिमय् बाढी प्रभावित क्षेत्रया भ्रमण लिपाः नेपालगञ्जय् पत्रकारत नाप खँल्हाबंला यानादिसें वयेकलं नागरिक सर्वोच्चता प्रति सु यक्व जिम्मेवार दु धकाः न्ह्यसः तयादिसें थुकीया लिसःया निंतिं न्हापाःया ज्याखँत स्वासाः गाः धयादिल । वयेकलं माओवादी स्वयां दक्वं पक्षं कांग्रेस व एमाले नागरिक सर्वोच्चता प्रति अप्वः प्रतिबद्ध जूगु दाबी यानादिल ।
नागरिक सर्वोच्चताया निंतिं माओवादीं सदनय् अवरोद्ध यानाच्वंगुया छुं औचित्य मदुगु धयादिसें गृहमन्त्री रावलं बजेट पारित यायेगु ई तक नं सदन अवरुद्ध जूसाः मेगू हे उपाय मलेगु धयादिल । वयेकलं माओवादीयात सहमतिलय् वयेत नं इनाप यानादिल ।
बाढी पाखें प्रभावित दक्वसित उद्धार यायेगू ज्या क्वचाःगु जानकारी बियादिसें मन्त्री रावलं सरकारं बाढी प्रभावितया निंतिं फ्यानात:गु झिंन्यागू करोडा मगासाः सरकार उकीयात अप्वयेकेत तयार जूगु धयादिल । वयेकलं मध्य व सुदूर पश्चिमय् बाढी पीडितया सरकारं आवश्यक राहत उपलब्ध याइगु कनादिल ।
