नेपाल संवत् छ्यलेगु प्रमया बचं
येँ (सन्ध्या टाइम्स)/ प्रधानमन्त्री माधव नेपालं नेपाल संवत् राष्ट्रया हे संवत् खः धइगु खँय् निगू मत मदु धासें थुकियात व्यवहारिक रुपं छ्यलेत संवत् सम्बन्धी विशेषज्ञलिसे याकनं हे बैठक च्वनाः छगू बिस्कं समिति स्वनेगु बचं बियादीगु दु।
नेपाल संवत् ११३० न्हूदँ तःजिक हनेत न्हूदँ समारोह समितिया नायः सभासद् तीर्थराम डंगोलया नेतृत्वय् थःथाय् वःगु छगू प्रतिनिधिमण्डललिसे खँ ल्हासें प्रम नेपालं उगु बचं बियादीगु खः ।
उगु इलय् भाजु डंगोलं नेपाल संवत्यात विगतया सरकारं राष्ट्रिय संवत् घोषणा याःसां उकिं व्यवहारिक मान्यता काये मखंगुलिं उकियात व्यावहारिक रुपं सञ्चालन यायेत छगू समिति स्वनेमाःगु व नेपाल संवत्या न्हूदँ क्यनीगु न्हि कुन्हु नं सार्वजनिक बिदा घोषणा यायेत माग यानादीगु खः। लिसें न्हूदँ समारोह समितिका छ्यांज्ये नरेशवीर शाक्यं न्हूदँया लसताय् बसन्तपुली जुइगु ज्याझ्वलय् मूपाहां कथं ब्वति कयादीत प्रमयात ब्वनापौ बियादिल। प्रतिनिधि मण्डलय् न्हूदँ समारोह समितिया दुजःत लक्ष्मण राजवंशी, आर.के. मानन्धर, भीमसेनदास प्रधान, विजय माली, कृष्णगोपाल श्रेष्ठ, डा.रत्नकमल वैद्य, सुरेन्द्रवीर मालाकार व सुजीव बज्राचार्यपिं दीगु खः ।
