ओमानय् नेपाःमि मिसायात मालिकं कुनातल
येँ (सन्ध्या टाइम्स)/निदँ न्ह्यः वैदेशिक रोजगारीया निंतिं खाडी मुलुक ओमान थ्यंम्ह छम्ह नेपाःमि मिसायात झिंछन्हु न्ह्यवंनिसें मालिकं कुनातःगु खँ सीदुगु दु। पाँचथरया पाक्तेपया ४२ दँ दुम्ह सुकमाया चेम्जोङयात थः ज्या यानाच्वंगु हे छेँया मालिकं कुनातःगु खः ।
२०६४ सालं भारतया मुम्बई जुयाः उखे वंम्ह चेम्जोङया पारिश्रमिक वापतया ४८ हजार ध्यबा तंगु विषययात कयाः छेँय् कुनातःगु खँ ओमानं चेम्जोङया जिलाजं धनबहादुर सावाँयात जानकारी याकूगु खः। पारिवारिक स्रोतं धाःकथं सुकमायायात साहुं छेँनं पित तकं मछ्वसे मानसिक यातना बियाः तयातःगु दु। सुकमायायात छ्वःपिं एजेण्ट भुपेन्द्रं कार्की व धनमाया चेम्जोङयात प्रहरीं ज्वनाः न्यनेकने यानाच्वंगु दु ।
