सभापति कोइरालाया असहमतिया दथुइ नं महासमितिया बैठक जुइगु
महासमितिया बैठक वीरगञ्जया पलेसा: येँ जुइगु
नेपाली कांग्रेसया सभापति गिरिजाप्रसाद कोइरालाया असहमतिया दथुइ नं महासमितिया बैठक जुइगु जूगु दु । पार्टी केन्द्रीय ज्याकू सानेपाय् शुक्रवा: च्वंगु केन्द्रीय समितिया बैठकं थुगु निर्णय याःगु खः । तर, महासमितिया बैठकया स्थान धा:सा हिला: येँ यायेगु निर्णय या:गु दु । थ्वस्वां न्ह्य: च्वंगु केन्द्रीय समितिया बैठकं महासमितिया बैठक वीरगञ्जय् यायेगु निर्णय या:गु ख: ।
थ्वस्वयां न्ह्यः कांग्रेस केन्द्रीय समितिया अनौपचारीक बैठकय् सभापति कोइरालां महासमितिया बैठक लिछ्यायेत इनाप यानादीगु खः । उगु इनापयात कांग्रेस कार्यवहाक सभापति सुशील कोइराला बाहेक दक्वं दुजःतय्सं विरोध याःगु खःसा कांग्रेस संसदीय दलया नेता रामचन्द्र पौडेलं सभापति कोइरालायात वीरगञ्ज तक वने थाकुइगु खःसा महासमितिया बैठक येँ हे यायेगु धकाः प्रस्ताव तयादीगु खः ।
बैठकं महासमितिया बैठक पूर्व निर्धारित मिति कार्तिक १५ गतेनिसें १७ गते तक हे यायेगु निर्णय याःगु दु । उगु बैठकय् संविधानसभा निर्वाचनय् थःपिनिगु हे पार्टीया उम्मेदवारयात ग्वाहालि मया:पिं नेतातय्त कारबाहीया बिषयलय् नं सहलह जूगु खः ।
