उपसमितिं प्रतिवेदन लःल्हात
न्हूगु संविधानया मस्यौदा तयार यायेत संवैधानिक समिति अन्तर्गत गठित उपसमितिं आः तकया प्रगति विवरण दुथ्याकाः प्रतिवेदन मूल समितियात शुक्रवाः लःल्हाःगु दु ।
सिंहदरवारय् शुक्रवाः च्वंगु समितिया बैठकय् उपसमितिं सहमति व असहमतिया बुँदात दुथ्याकाः प्रतिवेदन पेश याःगु खः । उपसमितिलय् विवाद जुइवं संविधानया प्रस्तावनाया भाय् लगायत राष्ट्रिय ध्वाँय्, राष्ट्रिय चिं, जनावर आदि विषयया बारे निर्णय यायेगु जिम्मा मूल समितियात ब्यूगु दु । समितिया आइतवा: च्वनीगु बैठकं उपसमितिं लःल्हाःगु प्रतिवेदन व निर्णय यायेमफुगु विषयलय् सहलह याइगु जूगु दु ।
समितिं गठन याःगु उपसमितियात बिहीवाः तक ई ब्यूगु खसां बिहीवाःया दुने सहमति जुइमफेवं मुल बैठक पाखें विवादय् लाःगु विषयया बारे निर्णय यायेमालीगु जूगु दु । संविधान निर्माणया कार्यतालिकाया खुक्वःगु संशोधनं कात्तिक दुने दक्वं समितिया अवधारणा व मस्यौदाय् सहलह क्वचायेकीगु ई क्वछीनातःगु खः । तर आः तक न्यागू समितिं मस्यौदा व अवधारणा तयार यायेफुगु मदुनीसाः थीथी खुगू समितिं धाःसा मस्यौदा व अवधारणा लःल्हायेधुंकूगु दु ।
सभासद् देव गुरुङ संयोजक जूगु उपसमितिं तयार याःगु मस्यौदा प्रतिवेदन मू समितिया सभापति निलाम्बर आचार्ययात लःल्हाःगु खः । बैठकलिपा न्वंवानादिसें समितिया सभापति निलाम्बर आचार्यं सहमति जुइमफुगु विषयत समितिया बैठक च्वनाः क्वःछिइगु जानकारी बियादिल । वयेकलं संविधानया प्रस्तावनाया विषयलय् ल्यंकाः मेगु विवादित विषयत सहलहपाखें क्वःछीमाःगु बिचा: प्वंकादिल । आचार्यं सहमतो यायेत उलि अःपू मजूसां सहलहपाखें सहमति जुइगु विश्वास प्वंकादिल ।
