अध्यादेश पाखें बजेट पारित यायेत संभव मदु : नेम्वाङ
संविधान सभाध्यक्ष सुवासचन्द्र नेम्वाङं अध्यादेश पाखें बजेट पारित यायेत संभव मदुगु खँ धयादीगु दु ।
नेपाःया निन्हुन्यंकया भ्रमणय् दुगु युरोपेली मुलुकया उच्च अधिकारीतय्गु पुच: लिसे नापलायेधुंकाः पत्रकारतलिसे खँल्हानादिसें सभाध्यक्ष नेम्वाङं दलतय्सं सहमति यानाः सदन न्ह्याकेमाःगु व बजेट सदनपाखें हे पारित यायेमाःगु बिचाः प्वंकादिल ।
नेपाःया निन्हुया भ्रमणय् दुगु युरोपेली मुलुकया उच्च अधिकारीतय्गु पुच: ट्रोइकां शुक्रवा: सुथय् सभाध्यक्ष नेम्वाङयात वय्कःया कार्यकक्षय् नापलानादीगु खः । उगु झ्वलय् सभाध्यक्ष नेम्वाङं पुच:यात इलय् हे संविधान निर्माण यायेगु प्रतिबद्धता व उगु प्रतिबद्धता पूवंकेत थःम्हं फ:क्व: कुत यायेगु बचं बियादिल । नेम्वाङं दलत दथुइया असहमति अन्त्य यायेत सहलह जुयाच्वंगु बारे ट्रोइकाया प्रतिनिधितय्त जानकारी बियादिल ।
खँल्हबंलाय् ट्रोइकाया प्रतिनिधितय्तय्सं नेपाःया शान्ति प्रक्रिया व संविधान निर्माणया निंतिं थःपिंसं ग्वाहालि यायेगु प्रतिबद्धता क्यनेगुया लिसें संविधान इलय् दयेकाः शान्ति व स्थिरता जुइमाः धइगु थःपिसं चाहे जूगु बिचा: प्वंकूगु खः ।
अथेहे ट्रोयकाया पुचलं शुक्रवा: राष्ट्रपति डा. रामवरण यादवलिसे नं नापलानादीगु खः । स्वीडेनया एसिया प्रशान्त डेस्कया प्रमुख क्लास मोलिनया नेतृत्वय् नेपा: वःगु पुचलं राष्ट्रपतिलिसे न्ह्यानाच्वंगु शान्ति प्रक्रिया, संविधान निर्माण व दलत दथुइया विवाद एवम् सहमतिया कुतःया विषयलय् सहलह याःगु दु ।
पुचलं थ्व स्वयां न्ह्यः म्हिगः प्रधानमन्त्री माधवकुमार नेपाल यात नापलाना: उगु विषयस सहलह याःगु खः ।
