संविधान निर्माण यायेगु दायित्व एमालेया ब्वहलय् : खनाल

नेकपा (एमाले)या नायः झलनाथ खनालं संविधान निर्माण यायेगु दायित्व एमालेया ब्वहलय् वःगु खँ धयादीगु दु ।

एमाले अर्घाखाँचीया अगुवा कार्यकर्तातय्गु भेलायात सदरमुकाम सन्धिखर्कय् शुक्रवां सम्बोधन यानादिसें वयेकलं वर्तमान सरकारयात राष्ट्रिय सरकारया रुप बियाः संविधान निर्माण यायेमाःगु धयादिल । नायः खनालं उग्रवामपन्थी विचारपाखें निरंकुशतापाखे मोडय् जूगु माओवादी व यथास्थितिइ च्वनेत स्वयाच्वंगु कांग्रेस संविधान निर्माणया पक्षय् सकारात्मक खनेमदुगु द्वपं नं बियादिल । निगू ध्रुवय् खनेदुगु कांग्रेस व माओवादीयात मिलन विन्दुइ हयाः संविधान निर्माण यायेत एमाले न्ह्यज्याना: च्वनेमाःगु बिचा: वयेकलं प्वंकादिल ।