राजनीतिक गतिरोध याकनं ज्यनीगु प्रमया विश्वास
प्रधानमन्त्री माधवकुमार नेपालं एकीकृत नेकपा (माओवादीं) मंका: संकल्प प्रस्तावय् संशोधन प्रस्ताव हयेवं राजनीतिक गतिरोध ज्यनीगु विश्वास प्वंकादीगु दु ।
शुक्रवा: काभ्रेया धैख्यलय् जूगु सूचना प्रविधि उच्च आयोगया बैठक लिपा: संचारकर्मीत लिसेया खँल्हाबल्हाय् कांग्रेस व एमालें तयार याःगु मस्यौदाया प्रस्तावय् माओवादीं याइगु संशोधनं गतिरोध बारे क्वःछीगु खँ धयादिल । व्येकलं माओवादीं याकनं हे संशोधन प्रस्ताव हइगु व उकीया बारे स्वंगू प्रमुख दलत च्वनाः सहलह यानाः याकन हे गतिरोध ज्यंकेगु धयादिल । वयेकलं गतिरोध ज्यंकेत तीव्र रुपं ज्या ययेगु नं धयादिल ।
कांग्रेस व एमालें तयार याःगु मंका: संकल्प प्रस्तावय् माओवादीं सरकारं बर्खास्त याःगु सेनापतियात थमौति यायेगु राष्ट्रपतिया असंवैधानिक पला:या बारे स्पष्ट रुपं न्ह्यथनेमाःगु अडान तयच्वंगु दु । तर सत्ता साझेदार कांग्रेस व एमालें माओवादीया अडानय् असहमति क्यनेवं गतिरोध अन्त्य जुइफुगु मदुनि ।
शुक्रवा: हे कास्कीया पोखराय् उच्च माध्यमिक शिक्षक एशोसियसन नेपाल 'हिसान'या स्वक्वःगु राष्ट्रिय महाधिवेशनया उलेज्या यानादिसें प्रधानमन्त्री नेपालं त्रिभुवन विश्वविद्यालयपाखें प्रमाणपत्र तह खारेज जूसा उकिया जिम्मेवारी उच्च मावितय् ब्वलय् वइगु धयादिल ।
'गुणस्तरीय शिक्षा व आमुल हिउपाः झीगु म्हसीका, पेशागत हकहित व स्थायित्वया निंतिं हिसानया अभियान' धइगु नारा बिया: न्ह्याःगु महाधिवेशनय् देय्न्यंकया उच्चमावि शिक्षक एसोसियसनया न्हय्सः प्रतिनिधीतय्सं ब्वति कयाच्वंगु दु ।
