माओवादीं आन्दोलनयात निरन्तरता बीगू
प्रमुख प्रतिपक्षी दल एकीकृत नेकपा (माओवादीं) सेनापति प्रकरणय् राष्ट्रपतिं ल्हवंगु पलाःया बारे सदनय् सहलह मजूतल्ले आन्दोलनया ज्याझ्वःयात निरन्तरता बीगू निर्णय याःगु दु ।
शुक्रवाः सिंहदरवारय् दुगु संसदीय दलया ज्याकूथी च्वंगु संसदीय दलया बैठकं सदनयय् राष्ट्रपतिया पलाःया बारे सहलह मजूतल्ले राजनीतिक सहमति जुइमफइगु निष्कर्ष पिकाःगु दु । निकासया निंतिं सहमति, सहकार्य व सम्वादयात निरन्तरता बीगू निर्णय नं बैठकं याःगु दु ।
थःगु मागया बारे सम्बोधन मजूतल्ले आन्दोलनयात सदन व सतकं जारी तयेगु निर्णय बैठकं याःगु खँ माओवादी संसदीय दलया उपनेता नारायणकाजी श्रेष्ठ 'प्रकाशं' कनादिल । वयेकलं दलत नाप सहमति लिपा जक राजनीतिक उच्चस्तरीय संयन्त्र व मेमेगू विषयलय् खँ न्ह्याइगु नं कनादिल ।
अथेहे बैठकं माओवादी सभासदत् थः यथ्थे विदेश भ्रमण वनेमदइगु निर्णय नं याःगु दु । विदेश वने न्ह्यः संसदीय बोर्ड पाखें अनुमति कायेमाःगु व्यवस्था याःगु जानकारी नेता प्रकाशं बियादिल । अथेहे बैठकं संसदीय दलया विधानय् संशोधन यानाः संविधानसभा संसदीय दलया ज्या प्रभावकारी दयेकेत बोडया व्यवस्था व ज्याकू स्थापना यायेगु निर्णय याःगु दु । बैठकं बोर्डया संयोजकय् संसदीय दलया उपनेता प्रकाशयात नियुक्त याःगु दु ।
बैठकं पश्चिम नेपालय् वःगु बाढी पहिरो पीडितया निंतिं प्रति सभासद द्वछि राहत संकलन यायेगु व सम्बन्धित क्षेत्रया सभासदयात बाढी प्रभावित क्षेत्रया निरीक्षण यायेत निर्देशन नं ब्यूगु दु ।
