पोखराय् माओवादी व प्रहरी दथुइ ल्वापू
पोखराय् छगू ज्याझ्वलय् ब्वति कायेत झायादिम्ह प्रधनमन्त्री माधवकुमार नेपालयात हाकूगु ध्वाँय् क्यसें नाराबाजी याःपिं एकीकृत नेकपा (माओवादी)या कार्यकर्ता व प्रहरी दथुइ शुक्रवाः ल्वापू जूगु दु ।
पोखराया सभागृहलय् उच्च माध्यमिक शिक्षक एशोसिएसनया अधिवेशन उल्लेज्या यायेत थ्यंकादिम्ह प्रधानमन्त्री विरुद्ध माओवादी कार्यकर्तातय्सं नाराबाजी यानाः सभागृह पाखे वनेवं प्रहरीं लाठीचार्ज याःगु खः । प्रहरीं याःगु लाठीचार्जया कारणं माओवादी कास्कीया इन्चार्ज रामजी बराल घाःपाः जूगु दु । लिपाः प्रदर्शकारी व प्रहरी दथुइ जूगु ल्वापूइ छम्ह सशस्त्र प्रहरी व न्ह्यम्ह माओवादी कार्यकर्तात घाःपाः जूगु दु ।
प्रदर्शनकारीतय्सं पृथ्वीचोकय् च्वनाः टायर च्याकाः प्रधानमन्त्री विरुद्ध नाराबाजी यानाच्वंगु दु । थ्वस्वयां न्ह्यः प्रधानमन्त्री नेपाल न्हिनय् झिंनिताः ईलय् पोखराय् अवतरण यायेवं एयरपोर्ट, नागदुङ्गा, सभागृह चोक लगायत थासय् च्वनाः माओवादी कार्यकर्तातय्सं नाराबाजी यानाः हाकूगु ध्वाँय् क्यंगू खः ।
प्रधानमन्त्री नेपाल पोखराय् वइगुलिं सुरक्षा व्यवस्था तसकं कडा या:सां प्रदर्शनकारीतय्सं थाय्थासय् प्रधानमन्त्रीयात हाकूगु ध्वाँय् क्यंगु खः ।
