लिपि गुथियात शंखधर सिरपाः
येँ (सन्ध्या टाइम्स)/थुगु दँया शंखधर सिरपाः नेपाल लिपि गुथिपाखें पिथना वयाच्वंगु 'तिथि म्हिचापौ' यात बीगु जूगु दु। ने.सं. १११० निसें लिपि गुथिं उगु म्हिचापौ पिथनाः स्वनिगः व स्वनिगलं पिने नेपाल संवत्या प्रचार प्रसार याना वयाच्वंगुलिं थुगु सिरपाः बीत्यंगु खः ।
संखधर सिरपाः समितिया नायः पद्मरत्न तुलाधरया सभापतित्वय् च्वंगु मुँज्यां थ्वहे वइगु कौलागा १३ शुक्रवाः कुन्हु नगदेशया गणेश माविइ छगू ज्याझ्वः यासें उगु सिरपाः लःल्हायेगु निर्णय याःगु दु। सिरपाः कथं ११,०३०/- तका दां व हनापौ बीगु खः ।
मुँज्यां आवंलि नेपाल संवत् व शंखधर साख्वाःया प्रचार प्रसार जक मखु थुकिया महत्वयात कयाः संरक्षण व संवर्द्धनय् योगदान बियावःगु संघसंस्था व व्यक्तियात नं थ्व सिरपाः बीगु निर्णय याःगु दु ।
