कांग्रेसय् महासमिति विवाद जारी
येँ (सन्ध्या टाइम्स)/ थ्वहे वइगु कार्तिकं याये धाःगु कांग्रेस महासमितिया बैठक बारे विवाद तच्वया वनेवं थौं च्वनाच्वंगु पार्टीया केन्द्रीय समितिया बैठकं थुकिया बारे ठोस निर्णय याये फइगु खँ धाःगु दु ।
पार्टी सभापति गिरिजाप्रसाद कोइरालां महासमितिया बैठक स्थगित यायेत दवाव बिया वयाच्वंगु दुसा आपालं केन्द्रीय दुजःतय्सं धाःसा उकियात अस्वीकार यासें इलय् हे महासमिति बैठक च्वनेमाःगु माग याना वयाच्वंगु दु ।
कांग्रेसं थ्वहे वइगु कार्तिक १५ निसें १७ गते तक वीरगञ्जय् महासमितिया बैठक यायेगु निर्णय यानातःगु खःसा सभापति कोइरालां असहमति क्यनेवं बैठक बारे अन्यौल ब्वलनाच्वंगु दु ।
थौंया बैठकय् आर्थिक व सुरक्षाया कारणं महासमितिया बैठक यायेत लिचिलाच्वंगु खःसा थाय् हिलाः जूसां समितिया बैठक सःतेमाःगु माग छुं नेतातय्सं याइगु खँ सीदुगु दु।
कांग्रेसया थौंया बैठकय् देय्या लिपांगु राजनीतिक परिस्थिति, माओवादीं न्ह्याकाच्वंगु आन्दोलन, पार्टीं तयार याःगु राज्य पुनर्संरचनाया बारे नं सहलह जुइगु खँ धाःगु दु।
अथे हे पार्टीया थीथी जिल्लाय् खनेदुगु विवाद ज्यंकेगु बारे नं सहलह जुइ ।
