शान्ति सम्झौता हीकेगु प्रस्ताव गनं वल ?
येँ (सन्ध्या टाइम्स)/सेनायात क्वातुकेगु लागिं तत्कालिन सरकार व माओवादी दथुइ जूगु वृहत् शान्ति सम्झौतायात हे पुनरावलोकन यायेमाः धकाः रक्षा मन्त्री विद्या भण्डारीं हयादीगु प्रस्ताव खनाः माओवादी सशंकित जूगु दु। विज्ञ सूत्रं बिउगु जानकारी कथं रक्षा मन्त्रीपाखें अज्याःगु प्रस्ताव गथे यानाः हल धइगु सिबें नं अज्याःगु प्रस्ताव गनं तयार जुयाः वल धइगु खँय् माओवादीया ध्यान वंगु दु ।
वृहत् शान्ति सम्झौताय् नेपाली सेना व माओवादी सेना निगुलिंयात मौन यानाः संयुक्त राष्ट्र संघया भूमिकायात अप्वः थाय् बियातःगु दु। नेपालय् राष्ट्र संघया भूमिकायात अप्वः थाय् बिउगु भारतयात ययाच्वंगु मदु ।
अथे हे नेपाली सेनायात जीवन्तपन बीगु धइगु थुकियात भारतीय सेनापाखें हानं न्हापा थें हे सैन्य ग्वाहालि उपलब्ध याकेगु खः। थौंकन्हय् थ्व ज्या दिनाच्वंगु दु। उकिं वृहत् शान्ति सम्झौताय् संशोधन यायेगु थ्व प्रस्ताव थ्वहे कोणं वःगु खः लाकि धइगु विश्लेषण माओवादीं यानाच्वंगु खँ नं उगु सूत्रं धाःगु दु ।
