इयु प्रतिनिधि नेपाः भ्रमणय्
येँ (सन्ध्या टाइम्स)/ नेपालय् न्ह्यानाच्वंगु राजनीतिक गतिरोध, न्ह्यानाच्वंगु शान्ति प्रक्रिया व न्हूगु संविधान बारे जानकारी कायेत नेपाः थ्यंकः वःगु युरोपियन युनियनया प्रतिनिधि मण्डलं थौं राजनीतिक भेटघाट न्ह्याकूगु दु।
नेपाःया शान्ति प्रक्रिया व विकास प्रति विशेष चिउताः व ग्वाहालि याना वयाच्वंगु युरोपियन युनियनया खुम्ह क्षेत्रीय निर्देशक सहितया पुचलं थौं प्रधानमन्त्री माधव नेपाल नापं परराष्ट्रमन्त्री सुजाता कोइराला, एमाले अध्यक्ष झलनाथ खनाल व एकीकृत नेकपा (माओवादी) अध्यक्ष पुष्पकमल दाहाल 'प्रचण्ड'यात नापलाइगु ज्याझ्वः दु ।
अथे हे पुचलं कन्हय् राष्ट्रपति डा. रामवरण यादव व संविधानसभाया अध्यक्ष सुवास नेम्वाङ्गयात नापलाइगु ज्याझ्वः दु ।
पुचः कन्हय् छगू पत्रकार सम्मेलन यासें थःपिनि भ्रमण बारे जानकारी बियाः लिहां वनीगु ग्वसाः दु ।
