राजमार्ग पीद्वः तका ध्यबा लुत
येँ (सन्ध्या टाइम्स)/व्यासभूमि यातायात व्यवसायी समितिया बस राजमार्गय् रोके जूगु खबर न्यनाः उकिया अवलोकन यायेगु निंतिं वंम्ह तनहुँया प्रहरी नायव उपरीक्षक राजेन्द्र विष्टं पीद्वः व निसः व चय्तका भारु उगु राजमार्गय् लुइकूगु दु ।
स्थानीय मिनिबस व्यवसायी समितिं राजमार्गय् बस दिनाच्वंगु खबर वयेवं विष्ट थःहे निरीक्षणया निंतिं घटनास्थलपाखे वंगु खः ।
राजमार्गय् वनाच्वंगु इलय् लँय् छरे जुयाच्वंगु उगु ध्यबा लूगु खः। उगु ध्यबाया लिसें भारतीय सेनाय् ज्या यानाच्वंम्ह भारतीय नागरिक भरत सिं खन्नाया परिचयपत्र नं लूगु खः।
आः उगु ध्यबायात कयाः मुचुल्का तयार यायेगु व घटनाया बारे थप अनुसन्धान जुयाच्वंगु जिल्ला प्रहरी कार्यालय तनहुँ धाःगु दु ।
प्रहरी मोटरसाइकलय् वनाच्वंगु इलय् ध्यबा लँय् कुतुं वंगु जुइ फुगु अनुमान याःगु दु ।
