म्हिगः नं नेप्से कुहां वन
येँ (सन्ध्या टाइम्स)/स्टायण्डर्ड चार्टर्ड बैंकया शेयर भाः कुहां वःगु कारणं छन्हु न्ह्यः २३ दशमलव ६९ अंकं कुहां नेप्से परिसूचक म्हिगः नं उगु बैंकया शेयरय् ३९६/- दां कुहां वयेवं परिसूचक ५ दशमलव ३२ अंकं कुहां वनाः ६०७ दशमलव ८६ अंकय् थ्यन। नेप्सेया लिसें कारोबार जूगु सेन्सेटिभ २ दशमलव १४ अंकं कुहां वःगु दुसा फ्लोट शुन्य दशमलव ५ अंकं कुहां वल ।
स्टायण्डर्डं शेयरधनीतय्त बोनस व लाभांश निगुलिं ५० प्रतिशत बीगु धकाः याःगु घोषणाया लिसें नेप्से कुहां वःगु खः। थ्वया लिसें स्टायण्डर्डया शेयर ३५६४/- तका थ्यंगु दु। थुगु बैंकया लिसें स्वीप्यंगू कम्पनीया कारोबार कुहां वल। ख्वीखुगू कम्पनीया कारोबार जूगुली नीन्यागू कम्पनीया भाः थहां वंगु दुसा न्हय्गू कम्पनीया भाः यथावत हे जुल। अथे हे स्टायण्डर्ड धुंकाः नविल व एनआईसी बैंकया नं शेयर भाः कुहां वःगु दु ।
मेमेगु बैंकया शेयरय् सामान्य भाः थहां वंसा शेयर बजाःया निगूगु तःधंगु बैंकया कारोबार कुशां वयेवं वाणिज्य समुह सूचक दकलय् अप्वः १० अंकं कुहां वनाः ५९४ दशमलव २४ अंकय् थ्यन। अप्वः थें विकास बैंकया नं भाः कुहां वयेवं थुगु समुहया सूचक ५ दशमलव ३ अंकं कुहां वयाः ६६१ दशमलव २४ अंकय् थ्यंगु दु। फाइनान्स समुह नं शून्य दशमलव ५१ अंकं कुहां वयाः ६३७ दशमलव ५२ अंकय् थ्यन ।
उखे थहां वंगु उपसूचकत मध्ये चिलिमे हाइड्रो पावरया शेयरय् २१/- तका थां वनेवं जलविद्युत समुह दकलय् अप्वः ६ दशमलव ८ अंक थहां वनाः ८२१ दशमलव ५७ अंकय् थ्यंगुस दु। अथे हे विमा समुह नं शुन्य दशमलव ४९ अंकं थहां वनाः ६०९ दशमलव शुन्य १ अंकय् थ्यन ।
म्हिगः नं नेप्से कारोबार शुरु जुइवं हे कुहां वन। वयां लिपा बाघौ तक स्थिर जूगु नेप्से हाकनं थहां वंगु खःसा अनंलिं थ्व क्रम कारोबारया अन्त तक नं कायम हे जुयाच्वन। छगू इलय् झिंनिगू करोड तका दांया कारोबार जूगु नेप्सेय् मोहनि नखः धुकाः निसें कारोबार उलि सन्तुष्टिगत रुपं थहां वये फयाच्वंगु मदु ।
नेप्सेय् म्हिगः छन्हुं हे जक नेपाल बङ्गलादेश बैंकया दकलय् अप्वः न्यय्छद्वः व न्हय्सः कित्ता शेयर न्याये-मी जुल। थ्व ल्याखं म्हिगः कारोबार जूगु कम्पनी मध्ये थुगु हें बैंकं दकलय् अप्वः छगू करोड पीन्हय्गू लाख पीच्याद्वः तका दांया कारोबार याःगु दु। मेखे पोखरा फाइनान्सं दकलय् अप्वः कमे याःगु दुसा गुडवील फाइनान्स लिमिटेडया प्रमोटर शेयरं दकलय् अप्वः गुमे याःगु दु ।
