पत्रकारतय्त जासुस दयेकेत स्वयाःगु मखु : गृहमन्त्री
गृहमन्त्री भीम रावलं विशेष सुरक्षा योजनाय् पत्रकारतय्त समावेश यायेगु विषय आपत्ति जूसाः उकीयाता भिंकेत सरकार तयार जूगु खँ धयादीगु दु । वयेकलं विशेष सुरक्षा योजनाय् पत्रकारतय्त जासुस दयेकेगु छुं हे नियत मदुगु नं स्पष्ट यानादिल ।
बिहीवाः गृहमन्त्रालयलय् ग्वसाःग्वःगु पत्रकार सम्मेलनय् गृहमन्त्री रावलं धयादिल, - 'पत्रकारत पाखें सूचना कायेत स्वयागु मखु, बरु सूचना प्रवाह बांलक जुइमाः धका पत्रकारतय्त संगठित यायेत स्वयाःगु खः ।'
वयेकलं यदि अथे यायेवलय् पत्रकारया दुरुपयोग जुइगु अर्थ लगेजुइसाः उकीयात भिंकेत सरकार तयार जूगु धयादिल । वयेकलं नीति निर्माण तहया सूचना थुइकेत पत्रकारयात सल्लहाकारया कथं उमिगु विशेषज्ञता कायेगु लक्ष्य जक जूगु धयादिल । वयेकलं थीथी लोकतान्त्रिक देशय् सल्लाहकार तइगु चलन दुथु धयादिसें थन नं पत्रकारयात भत्ता बिया दक्षता कायेत जक स्वयाःगुलिं थुकीयात मेगू अर्थय् मथुइकेत इनाप यानादिल ।
विशेष सुरक्षा योजनाय् जिल्लाया उप-समियिता संयोजकत्वय् राष्ट्रिय अनुसन्धान अधिकृत संयोजक, स्थानीय एफएमया प्रतिनिधि पत्रकार छम्ह, टेलिभिजनया प्रतिनिधि पत्रकार छम्ह व पत्रकारिता क्षेत्रया छम्ह दुजः दइगु व्यवस्था याःगु यात नेपाल पत्रकार महासंघं पत्रकारयात सुराकीया निंतिं छ्यलेत स्वःगु धासें थुगु योजना प्रति खेद प्रकट याःगु खः ।
