शान्ति प्रकृया प्रति युरोपेली प्रतिनिधिमण्डलया च्यूताः
नेपाः भ्रमणय् दुगु युरोपेली संघया प्रतिनिधिमण्डल (ट्रोडकां) प्रधानमन्त्री माधवकुमार नेपाल नाप नापलाना शान्ति प्रकृया, संविधान निर्माण, सेना समायोजन, अयोग्य लडाकु पुनःस्थापना लगायतया विषयलय् सहलह याःगु दु ।
स्विडेनया विदेश मन्यालया एसिया प्रशान्त विभाग प्रमुख क्लास मोलिनया नेतृत्वय् नेपाः भ्रमणय् वःगु खुम्ह दुजः दुगु पुचलं बिहीवाः प्रधानमन्त्रीयात नापलानाः शान्ति प्रकृयाय् संघया पूर्ण सर्मथन दुगु खँ धा:गु दु । युरोपेली संघं नेपाःया पूर्वाधार निर्माणय् यानावयाच्वंगु आर्थिक ग्वाहालियात नं निरन्तरता बीगू खँ धाःगु दु ।
प्रतिनिधिमण्डलं अप्वयाच्वंगु दण्डहिनता, नागरिक अधिकार संरक्षण, हिमाली क्षेत्रय् मौसम परिवर्तनया नकारात्मक लिच्वः लगायत विषयलय् च्यूताः प्वंकूगु खः ।
प्रधानमन्त्री नेपालं संघया ग्वाहालिया प्रशंसा यानादिसें निरक्षरता उन्मुलन, स्वास्थ्य व खाद्य सुरक्षा लगायत विषयलय् थप ग्वाहालि यायेत इनाप यानादिल । प्रधानमन्त्रीं संघया प्रतिनिधिमण्डलयात शान्ति प्रकृया, संविधान निर्माण, सेना समायोजन व अयोग्य लडाकू पुनःस्थापना लगायातया विषय सरकारया प्राथमिकता जूगु धायादिसें उकीया प्रगतिया बारे जानकारी बियादीगु खः ।
युरोपेली प्रतिनिधिमण्डलं बिहीवाः हे परराष्ट्रमन्त्री सुजाता कोइराला व ज्ञानचन्द्र आचार्य नापं नं खँल्हाबंला याःगु दु । खँल्हाबंलाय् समसामयिक राजनीतिक घटनाक्रम व नेपाः व युरोपेली संघया स्वापूया बारे खँल्हाबंला जूगु खः ।
निन्हुन्यंकया नेपा: भ्रमणया झ्वलय् ट्रोइकां शुक्रवा: राष्ट्रपति डा. रामवरण यादव व संविधानसभा अध्यक्ष सुवास नेम्वाङ, प्रमुख राजनीतिक दलया नेतात नाप खँल्हाबंला याइगु ज्याझ्व: दु । प्रतिनिधिमण्डलं निर्वाचन आयोग, राष्ट्रिय मानव अधिकार आयोग, नेपा:स्थित राष्ट्रसंघीय मानवअधिकार उच्चायोग, अनमिनया पदाधिकारी नाप नं सहलह याइगु जूगु दु ।
