राष्ट्रपतिया बारे संसदय् सहलह यायेत एमाले तयार : गौतम
नेकपा (एमाले)या उपाध्यक्ष बामदेव गौतमं राष्ट्रपतिया पलाःया बारे संसदय् सहलह यायेत एमाले तयार जूगु खँ धयादीगु दु ।
बिहीवाः जनकपुर विमानस्थलय् पत्रकारत नाप खँल्हाबंला यानादिसें उपाध्यक्ष गौतमं राष्ट्रपतिं प्रधानसेनापति यात थमौति बीत ल्ह्वंगु पलाः असंवैधानिक जूगु धयादिसें उकीया बारे संसदय् सहलह यायेत एमाले तयार जूगु धयादिल ।
वयेकलं दकलय् तःधंगु दल एकीकृत नेकपा (माओवादी)यात सरकारं पिने तयाः वर्तमान समस्याया समाधान मजुइगु धयादिसें माओवादी बिनाः शान्ति प्रकृया पूमवनीगु व शान्ति स्थापनाः मजुइगु दाबी यानादिल ।
निर्धारित ईया दुने संविधान निर्माण यायेगु आःया प्रमुख हाथ्या जूगु धयादिसें माओवादी सहित प्रमुख दलत दथुइ एकता जुइमाःगु खँय् बः बियादिल ।
धनुषा व महोत्तरीलय् एमाले दुने खंगु विवाद ज्यंकेत जनकपुर थ्यंकादिम्ह नेता गौतमं पार्टी दुनेया विवाद बारे छुं टिप्पणी यानामदी ।
