स्वंगू दलया कारणं गतिरोध मज्यंगू उपप्रमया द्वपं

उपप्रधानमन्त्री विजयकुमार गच्छदारं स्वंगू तःधंगू दलया स्वार्थया कारणं वर्तमान समस्या मज्यंगू द्वपं बियादीगु दु ।

झापाया भद्रपुरय् बिहीवाः पत्रकार नापलायेगु ज्याझ्वलय् उपप्रधानमन्त्री गच्छदारं एकीकृत नेकपा (माओवादी), नेपाली कांग्रेस व नेकपा (एमाले) थःथःगु स्वार्थय् अडिग जूगुलिं वर्तमान गतिरोध ज्यंके मफुगु धयादिल । वयेकलं देशय् शान्ति प्रकृयायात तार्किक निष्कर्षय् थ्यंकीगु व संविधान निर्माण यायेगु निगू महत्वपूर्ण जिम्मेवारी दुगु धयादिसें थुगु जिम्मेवारी पूवंकेत दलत छप्पं जुइमाः धयादिल ।

वयेकलं वर्तमान सरकार क्वथला थःगु नेतृत्वया सरकार गठन जुइगु माओवादीया दाबी म्हगसः जक जूगु दाबी यानादिल । वयेकलं बहुमत प्राप्त वर्तमान सरकारं हे संविधान निर्माण व शान्ति प्रकृयायात निष्कर्षय् थ्यंकीगु नं दाबी यानादिल ।