सरकारं बाढी पहिरो पिडीतयात क्षतिपूर्ति बीगू
महिला आयोग व समाज कल्याण परिषद खारेज
मन्त्रिपरिषदया बैठकं मध्य व सुदूरपश्चिमया बाढी पहिरो पिडीतयात क्षतिपूर्ति बीगु निर्णया याःगु दु । सिंहदरवारय् बुधवाः च्वंगु मन्त्रिपरिषदया बैठकं बढी पहिरो पिडीत क्षेत्रय् क्षतिया विवरण थुइकाः प्याकेजय् राहत बीगु निर्णय याःगु दु ।
प्यन्हु न्ह्यः निसें मदिक्क वा वयाः मध्य व सुदूरपश्चिमय् पीप्यम्ह सीधुंकूगु दुसाः द्वलं द्व मनूत विस्थापित जुइधुंकूगु दु ।
अथेहे बैठकं सिराहालय् हत्या याम्ह एमालेया तत्कालीन सभासद हेमनारायण यादव व महोत्तरीया गाविस सचिव अल्लाउद्धीन अन्सारीयात सहिद घोषणा यायेगु निर्णय नं याःगु दु । अथेहे बैठकं समाजकल्याण परिषद व महिला आयोग खारेज यायेगु निर्णय याःगु दु । नापं मोहनी व स्वन्तिया लसताय् देयन्यंकया निस व प्यम्ह कैदीयात त्वतेगु निर्णय याःगु दु ।
बैठकं बझाङय् स्या:पिं स्वम्हेसिया छेँजःयात स्वंगू लाख व मनाङया नारय् यार्सागुम्बा काःवंगु ईलय् हत्या जूपिनि छेँजःयात छगू लाख व ख्वपःया चपाचोकय् स्यापिंनि छेँजःयात न्यय्न्याद्वं तका क्षतिपूर्ति बूगु निर्णय याःगु दु ।
सरकारं कावेली जलविद्युत परियोजना संचालन यायेत स्विकृति बीगू नापं अवैध मदिरा नियन्त्रणया निंतिं होर्डिङ बोर्डय् विज्ञापन यायेत निषेध याःगु दु ।
