वाईसीएल व युथफोर्स ल्वापु

वाईसीएल व युथ फोर्स दथुइ ताःई न्ह्यवंनिसें ल्वापु जुयाच्वंगु दुसा थ्वहे झ्वलय् निगुलिं पुचःया आपालं कार्यकर्ताया ज्यान वनेधुंकूगु दु । मेखे सर्वसाधारण जनतां नं थुकिं यानाः सास्ति फये मालाच्वंगु दु । थ्व निगू पुचः दथुइ जुयाच्वंगु ल्वापुयात ज्यंकेगु निंतिं निगुलिं पार्टीं केन्द्रीय रुपं खँल्हाबल्हा यानाः थः कार्यकर्तातय्त आवश्यक निर्देशन बीगु धाःसां नं आः तक निगुलिं पार्टीं अज्याःगु निर्देशन मबिउ वा बिउसां नं कार्यकर्ता मन्यंगु खः धइगु न्ह्यसः नं थन ब्वलनाच्वंगु ।

थ्वहे छवाःया दुने धादिङ्ग व सिराहाय् जूगु ल्वापुइ लानाः निम्ह वाईसीएल कार्यकर्ता सीगु दुसा निगुलिं पुचःया तःम्ह कार्यकर्ता घाःपाः जूगु दु । अथे खःसां निगुलिं पार्टीं ल्वापु दिकेगु पहल याःगु मदुनि । थुकिं यानाः थज्याःगु ल्वापु झन तच्वया वनीगु जकं मखुला धइगु ग्याःचिकु ब्वलनाच्वंगु दु । संक्रमणकालीन वर्तमान राजनीतिक अवस्थाय् राजनीतिक विचारधाराय् दुगु निगू पुचःया थुकथं दथुइ ल्वापु जुया च्वनीगु धइगु निश्चय नं आःया इलय् ल्वःगु खँ मखु । सत्ता साझेदारी यानाच्वंगु राजनीतिक पार्टीया कार्यकर्ता दथुइ हे थवंथवय् ल्वाना च्वन धाःसा थुकिया लबः निश्चित रुपं देय् व जनताया भिं चाहे मजूपिंसं काइगु निश्चित दु । विशेषतः थौंया परिस्थितिइ राजनीतिक पार्टीतय् दथुइ थःथवय् निरन्तर सहलह व सहकार्य यायेत पार्टीतय्सं केन्द्रीय तहलय् जक मखु कार्यकर्ता तहलय् तकं शान्ति समिति दयेकेमाः धकाः धयाच्वंगु अवस्थाय् निगू राजनीतिक पार्टीया कार्यकर्ता दथुइया ल्वापुं उगु शान्ति समितिइ तकं नं लिच्वः लाइगुपाखे एमाले व माओवादीं निगुलिं पुचलं बिचाः यायेमाः ।

More Stories Like this