प्रधानमन्त्री व मन्त्रीत रिङरोड भ्रमणय्
प्रधानमन्त्री माधवकुमार नेपाल व मन्त्रीतय्सं येँया ट्राफिक जाम व फोहर व्यवस्थापनया प्रत्यक्ष अवलोकन याःगु दु ।
बुधवाः च्वंगु मन्त्रिपरिषदया बैठक क्वचायेवं जनतानाप प्रत्यक्ष सरोकारया विषयलय् सहलह यायेगु धासें प्रधानमन्त्री नेपाल पर्यटक बसय् च्वना: मन्त्रीत नापं सिंहदरवारं पिहांवंगु खः । प्रधानमन्त्री व मन्त्रीत थःगु सुरक्षाकर्मीतय्त सिंहदरवारय् त्वःताः रिङरोड भ्रमणय् वंगु खः । भ्रमणय् वंगु ईलय् नेपाल प्रहरीया निगः भ्यानं धाःसा बसया न्ह्यने व ल्यूने स्कर्टिङ याःगु खः ।
ट्राफिक जामया कारण सर्वसाधरणं भोगे यायेमाःगु समस्या व येँया थीथी थासय् मुनाच्वंगु फोहर बारे प्रत्यक्ष अनुभूति यायेत प्रधानमन्त्री व मन्त्रीत व्यस्त कार्यतालिकां ई पिकयाः भ्रमणय् वंगु खः । मन्त्रिपरिषदया दुजःतय्सं घौच्छि बसय् च्वनाः येँया चक्रपथ, बालाजु, महाराजगञ्ज, बालुवाटार, कलंकी, पुतलीसतक लगायतया व्यस्त थाय्या ट्राफिक जामया अवलोकन याःगु खः ।
प्रधानमन्त्री नेपालं भ्रमण लिपाः जनताया ज्या गुकथं जुयाच्वंगु धका थुइकेत थुगु भ्रमणं ग्वाहालि जूगु प्रतिक्रिया बियादिल ।
प्रधानमन्त्री नाप उपप्रधानमन्त्री विजयकुमार गच्छदार, गृहमन्त्री भीम रावल, स्थानीय विकास मन्त्री पूर्णकुमार शेर्मा लगायत मन्त्रीत नं अवलोकनय् वंगु खः । मन्त्रिपरिषदया बैठक लिपा पौने चार बजे सिंहदरवारं पिहांवंगु प्रधानमन्त्रीया पुचलं भ्रमणया बारे सुरक्षाकर्मीयात नं जानकारी मयाःगु खँ सीदुगु दु ।
