न्हूदँ समारोहय् तीर्थराम डंगोल

येँ (सन्ध्या टाइम्स)/ नेपालभाषा मंकाः खलःया आयोजनाय् छत्रपाटी पार्टी प्यालेसय् जूगु छगू मुँज्याय् नेपाल संबत्यात आधिकारिक छ्यलाबुलाय् हयेत अझ नं नेवाःतय्सं एकताबद्ध आन्दोलन न्ह्याकां तुं वनेमाःगु निर्णय यासें न्हूदँ समारोह समिति - ११३० या पदाधिकारी व दुजःपिनिगु ल्यज्या जुल ।

न्हूगु गठन याःगु न्हूदँ समारोह समितिइ तीर्थराम डंगोलयात नायः, पुलांपिं नायःपिं लक्ष्मण राजवंशी, डा. रत्नकमल वैद्य, आर.के. मानन्धर व सुरेन्द्रवीर मालाकारपिंत हनेबहपिं दुजः कथं ल्यःगु दु ।

अथेहे समितिया दुजलय् एकाराम सिंह, चन्द्रमान मुनिकार, सानुराजा शाक्य, विजयबहादुर माली, प्रा. भिमसेनदास प्रधान, शरद कसाः(थायमरु), रज्जु रञ्जितकार व कस्तुरी श्रेष्ठयात ल्यःगु दु ।

मुँज्याय् न्हूपिं पदाधिकारी व दुजःपिनिगु नां हनेबहम्ह नेवाः न्ह्यलुवा पदमरत्न तुलाधरं ब्वनाः न्यंकादिसें वय्कलं - स्वीदँ न्ह्यवंनिसें नेपाल संबत् राष्ट्रिय संबत्, न्हूगु दँया भिंतुना धकाः न्ह्याकाः वयाच्वनागु सांस्कृतिक तथा भाषिक आन्दोलनपाखें शंखधर साख्वाःयात राष्ट्रिय विभूतिकथं मान्यता बीधुंकूगु व नेपाल संबत्यात राष्ट्रिय संबत्कथं मान्यता बीधुंकूगु खँत झीगु उपलब्धि खःसां आधिकारिक रुपय् नेपाल संबत् छ्यलाबुलाय् मवःनिगुलिं आन्दोलन न्ह्याकां तं वनेमाःगु विचाः प्वंकादीगु दु ।

अथेहे न्हूदँ समारोह समिति - ११३० या न्हूम्ह नायः तीर्थराम डंगोलं सिनाज्यां वा मपिल धाःसा सामाज्यां वा लये मखनिगु दृष्टान्त बिसें नेवाः स्वायत्त राज्य कायेगु खःसा इलय् हे नेवाः जागरण हयेमाःगु व प्रत्येक छेँखांपतिकं छम्ह नेवाः राजनीतिइ लगे जुइमाःगु खँय् बः बियाबिल। लिसें वय्कलं मेगु दँय् धात्थें नेपाल संबत्यात आधिकारिक रुपय् छ्यले फत धाःसा जक थ्व समिति सफल जूगु तायेके फइ धयादीगु दु ।

थुगु हे मुँज्याय् नेपालभाषा मंकाः खलःया छ्यांज्ये नरेशवीर शाक्यं न्हूदँ समारोहया ऐतिहासिक खँ उलादिसें न्हूदँ समारोह समिति - ११२९ या ल्याःचाः नं न्ह्यब्वयादिल।
मुँज्याय् सहभागी वक्तातय्सं पञ्चांग निर्णायक समितिया गलत निर्णयया कारणं थुगुसिया स्वन्ति नखःया तिथिमिति नं पाकाबिसें नेवाःतय्त विभाजित यायेत स्वःगु दु धयादिल। लिसें थुगुसिया स्वन्ति नखः नेवाःतय्सं कार्तिक १, २, ३ कुन्हु झ्वःलाक कथहं लक्ष्मी पुजा, म्हपुजा-न्हूदँ व किजा पूजा हनेत इनाप यासें कार्तिक ३ गते नं सार्वजनिक बिदा बीत सरकारयाके जोडदार माग याःगु दु। लुमंकेबह जू, पञ्चांग निर्णायक समितिं दयेकूगु थुगुसीया सरकारी व गैर नेवाःतय्गु पात्रय् ३१ गते लक्ष्मीपुजा, कार्तिक १ व २ गते म्हपुजा व किजापुजा लाकाः २ गते तक जक तिहारया विदा धकाः सरकारी विदा बियातःगु दु ।