चखलं ल्हानाः आपालं मनू सित

येँ (सन्ध्या टाइम्स)/ निरन्तर वःगु वां यानाः पवर्तय् वःगु चलखं ल्हानाः छखा हे छेँया प्यम्ह सीगु दुसा निम्ह घाःपाः जूगु दु ।

थौं सुथय् ५:३० बजे पाखे पर्वतया थापाथान गाविस ५ वडाय् वःगु चलखं दुर्गाबहादुर भण्डारीया छेँ ल्हाःगु खः। उकी लानाः दुर्गाबहादुर, वया कलाः बिनु भण्डारी, म्ह्याय् सीमा व काय जितबहादुर सीगु खःसा निम्ह म्ह्याय् बिन्दु व रेखा घाःपाः जूगु खः ।

अथे हे अछामय् नं चलखं छखा छेँ ल्हानाः छखा हे छेँया प्यम्ह सीगु दु। अनया मार्को गाविसय् वःगु चलखं ठगे भुलया छेँ ल्हानाः ठगे सहित कलाः व मस्त सीगु खः।
अछामया हे विन्ध्यवासिनी नं चलखं ल्हानाः छम्ह मनू सीगु दु। विन्ध्यवासिनीया मुकेश सुनार चलखं ल्हानाः सीगु दु। घटनास्थल सदरमुकाम स्वयां ताःपाःगुलिं अनया बारे पूवंक सीके मफुनिगु खँ प्रहरीं धाःगु दु ।

सुदूरपश्चिमय् निरन्तर वःगु वां यानाः आपालं थाय् खतरापूर्ण अवस्थाय् लाःवंगु खँ नं प्रहरीं धाःगु दु ।

म्हिगः नं सुदूर पश्चिमया थीथी थासय् वःगु चलखं ल्हानाः ३६ म्ह मनू सीगु खः । सुदूरपश्चिमय् अझ मेगु छन्हु निन्हु वा वइतिनिगु खँ मौसम पूर्वानुमहाशाखां धाःगु दु ।